HBD Narendra Modi: రాజకీయ విజేయుడు నరేంద్ర మోదీ.. ప్రధానిపై పవన్ కళ్యాణ్ పొగడ్తల వర్షం

నేడు భారత ప్రధాని నరేంద్ర మోదీ (Narendra Modi) పుట్టిన రోజు. మోదీ 72వ పుట్టినరోజు సందర్భంగా సామాన్యుల దగ్గర నుంచి ప్రపంచ నేతల వరకు సోషల్ మీడియా వేదికగా బర్త్ డే విషెస్ చెబుతున్నారు. దేశవ్యాప్తంగా బీజేపీ శ్రేణులు పుట్టినరోజు వేడుకలను ఘనంగా నిర్వహిస్తోంది. సామాజిక సేవా కార్యక్రమాలు నిర్వహిస్తున్నారు. మోదీ బర్త్ డే వేడుకలను నెలరోజుల పాటూ నిర్వహించబోతున్నారు.

జనసేన అధినేత, పవర్ స్టార్ పవన్ కళ్యాణ్ (Pawan Kalyan) ప్రధాని మోదీకి జన్మదిన శుభాకాంక్షలు తెలిపారు. 'ప్రధాన మంత్రి నరేంద్ర మోదీ గారికి హృదయపూర్వక జన్మదిన శుభాకాంక్షలు. దేశానికి వరుసగా రెండుసార్లు ప్రధాన మంత్రిగా, గుజరాత్ రాష్ట్రానికి నాలుగుసార్లు ముఖ్యమంత్రిగా పని చేసిన అజేయ రాజకీయ విజయుడు నరేంద్ర మోదీ గారు. ఒక సాధారణ దిగువ మధ్యతరగతి కుటుంబంలో పుట్టిన ఒక సామాన్యుడు.. అసామాన్యమైన భారతదేశపు ప్రధాన మంత్రిగా నిలిచారంటే ఆ రాజకీయ ప్రయాణం ఎంత సంక్లిష్టమైనదో మనం ఊహించవచ్చు.

ముఖ్యమంత్రిగా గుజరాత్ రాష్ట్రాన్ని అగ్రగామిగా నిలిపిన ఆయన దార్శనికత, ప్రధాన మంత్రిగా క్లిష్టమైన, సున్నితమైన అంశాలపై తీసుకున్న నిర్ణయాలు ఆయనను రాజకీయవేత్తగా అగ్రపథాన నిలిపాయి. పెద్ద నోట్ల రద్దు, జీఎస్టీ అమలు, కాశ్మీర్‌కు సంబంధించిన 370 అధికరణం, ట్రిపుల్ తలాక్ రద్దులు, పౌరసత్వం సవరణ చట్టం, జాతీయ పౌర జాబితా అమలు వంటివి సాహసోపేత నిర్ణయాలుగా చెప్పవచ్చు.

భారతీయ ఔన్నత్యం, సంస్కృతి పరిరక్షణకు ఆయన చేస్తున్న కృషి కొనయాడతగినది. ప్రధాన మంత్రిగా ఆయన మరిన్ని విజయాలు సాధించాలని, ఆయన నాయకత్వంలో భారత్ అగ్రగామి దేశంగా వెలుగొందాలని కోరుకుంటున్నాను. మోదీ గారికి ఆ భగవంతుడు సంపూర్ణ ఆయురారోగ్యాలు ప్రసాదించాలని ప్రార్థిస్తున్నాను..' అని పవన్ కళ్యాణ్ అన్నారు. ఈ మేరకు జనసేన పార్టీ ఓ ప్రెస్ నోట్ రిలీజ్ చేసింది.