ప్రభాస్, రానాలతో వైరస్ ముప్పు!

దక్షిణాది స్టార్ నటులు ప్రభాస్, రానా, కోలీవుడ్ సీనియర్ నటుడు ప్రభుతో చాలా ప్రమాదమని ప్రపంచ స్థాయి సైబర్‌ సెక్యూరిటీ సంస్థ మెకాఫే హెచ్చరిస్తోంది. గూగుల్ సెర్చ్ ఇంజిన్‌లో వీరి పేర్లతో సెర్చ్ చేసినప్పుడు అప్రమత్తంగా ఉండాలని మెకాఫే సూచించింది. సెలబ్రిటీల పేర్లతో సెర్చ్ ఇంజన్ లో ఎంతవరకు సురక్షితం అన్నదానిపై ఏటా మెకాఫే అధ్యయనం చేసి ర్యాంకులు ఇస్తుంది. ఈ ఏడాది సెర్చ్ ఇంజిన్‌లో అత్యంత ప్రమాదకరమైన దక్షిణాది నటుడిగా సీనియర్ నటుడు ప్రభు తొలిస్థానంలో నిలిచాడని మెకాఫే తెలిపింది. ఆ తరువాతి స్థానాల్లో ప్రభాస్, రానా దగ్గుబాటి నిలవడం విశేషం.

వీరిపేర్లను గూగుల్‌లో సెర్చ్ చేసినప్పుడు అప్రమత్తంగా ఉండాలని, లేకపోతే సైబర్ దాడి జరిగే అవకాశంతో పాటు వైరస్ చొరబడే ప్రమాదం ఉందని మెకాఫే హెచ్చరించింది. దేశవ్యాప్తంగా చేసిన సెర్చ్‌లో హిందీ టీవీ కమేడియన్ కపిల్ శర్మ తొలిస్థానంలో నిలిచాడు. కపిల్ శర్మ పేరుతో సెర్చ్ ఇంజిన్ లో వెతికితే 9.58 శాతం హానికర వెబ్‌ సైట్స్‌ ఓపెన్ అవుతున్నాయని మెకాఫే వెల్లడించింది. 2016 సర్వేలో బాలీవుడ్ బొద్దుగుమ్మ సోనాక్షీ సిన్హా మొదటి స్థానంలో నిలవగా, ఆమె స్థానాన్ని ఈ ఏడాది కపిల్ శర్మ ఆక్రమించాడు. అతడి తరువాత సల్మాన్, ఆమీర్ ఖాన్‌లు, 8.5శాతంతో ప్రియాంకా చోప్రా ఉన్నట్లు మెకాఫే తెలిపింది. గతేడాది ఏడోస్థానంలో ఉన్న ప్రియాంక ప్రస్తుతం నాలుగో ర్యాంకులో ఉన్నారు.