అనుష్కతో పెళ్లా.. అలాంటిదేమీ లేదు!

మొన్నటి వరకు బాహుబలి సినిమా గురించి తెగ చర్చించుకున్న సోషల్ మీడియా మేధావులు ఇప్పుడు ప్రభాస్ పెళ్లిపై పడ్డారు. ప్రభాస్ పెళ్లి ఎప్పుడు..?, ఎవరిని పెళ్లి చేసుకోబోతున్నాడు..?, ఆయనకెవరైనా గర్ల్‌ఫ్రెండ్ ఉన్నారా..? ఇలా ఇప్పటికే సోషల్ మీడియాతో పాటు బయట కూడా చర్చ జరుగుతుందో. తాజాగా మరో చర్చ సోషల్ మీడియాలో రచ్చ చేస్తోంది. అదే.. ప్రభాస్, అనుష్క నిశ్చితార్థం రూమర్. వీరిద్దరూ డిసెంబర్‌లో నిశ్చితార్థం చేసుకోబోతున్నారంటూ సినీ విమర్శకుడు ఉమైర్ సంధు ట్వీట్ చేసిన తరవాత ఈ విషయం సోషల్ మీడియాలో వైరల్ అయిపోయింది. దీనిపై జోరుగా ప్రచారం జరుగుతోంది. అయితే ఈ రూమర్‌ని ప్రభాస్ తరఫున ఆయన ప్రతినిధులు ఖండించారు.

ప్రభాస్, అనుష్కలపై తప్పుడు ప్రచారం జరుగుతోందని వారు స్పష్టం చేశారు. ఇలాంటిదేమైనా ఉంటే ప్రభాస్, అనుష్క స్వయంగా ప్రకటిస్తారని, అంతేకానీ సంబంధంలేని వారు సోషల్ మీడియాలో ప్రకటించరని చెప్పారు. కాగా, వెండితెరపై ప్రభాస్‌, అనుష్క జంటకు కెమిస్ట్రీ బాగా కుదిరింది. దానికి తోడు వీరిద్దరూ పెళ్లికి దూరంగా ఉండటం, ఇద్దరి మధ్య మంచి సాన్నిహిత్యం ఉండటంతో అందరూ అపోహ పడుతున్నారు. దీంతో వీరిద్దరి సంబంధంపై ఏ గాలి వార్త వచ్చినా సోషల్ మీడియాలో వైరల్ అయిపోతోంది. గతంలో కూడా వీరిద్దరూ పెళ్లిచేసుకోబోతున్నారంటూ వదంతులు వచ్చాయి. వాటిని అప్పట్లో అనుష్క ఖండించింది. మళ్లీ ఇప్పుడు అదే పనిగా వార్తలు హల్‌చల్ చేయడంతో ప్రభాస్ ప్రతినిధులు స్పందించారు.
Breaking News for #Baahubali Fans ! #Prabhas & #AnushkaShetty will get engaged this December ! They are officially in Relationship Now. 😍 pic.twitter.com/Q8AaisOzVc — Umair Sandhu (@sandhumerry) October 3, 2017
ప్రస్తుతం ప్రభాస్, అనుష్క వారివారి సినిమాలతో బిజీగా ఉన్నారు. ప్రభాస్‌ ‘సాహో’ చిత్రంలో నటిస్తున్నాడు. ఈ సినిమా షూటింగ్‌ శరవేగంగా జరుగుతోంది. బాలీవుడ్‌ హీరోయిన్ శ్రద్ధాకపూర్‌ ఇందులో కథానాయికగా నటిస్తోంది. భారీ బడ్జెట్‌తో నిర్మిస్తున్న ఈ చిత్రానికి సుజీత్‌ దర్శకత్వం వహిస్తున్నారు. మరోవైపు అనుష్క ఇటీవలే ‘భాగమతి’ చిత్ర షూటింగ్‌ను పూర్తి చేసుకుంది. జి.అశోక్‌ దర్శకత్వంలో రూపుదిద్దుకుంటోన్న ఈ చిత్రాన్ని తెలుగు, తమిళ భాషల్లో విడుదల చేయనున్నారు. కాగా.. ప్రభాస్, అనుష్క కలసి ఇప్పటి వరకు ‘బిల్లా’, ‘మిర్చి’, ‘బాహుబలి’, ‘బాహుబలి 2’ చిత్రాల్లో నటించారు. వీటిలో ‘మిర్చి’ సినిమాలో వీరి జంటకు మంచి మార్కులు పడ్డాయి.