ముచ్చటగా ముగ్గురు భామలు ‘సాహో’ అంటున్నారే!

ప్రభాస్ నటిస్తోన్న 'సాహో' సినిమాలో హీరోయిన్ ఎవరనే విషయంలో ఇప్పటివరకు క్లారిటీ రాలేదు. బాలీవుడ్ ముద్దుగుమ్మలను రంగంలోకి దింపాలనుకున్నారు కానీ వారు పారితోషికం ఎక్కువ డిమాండ్ చేయడం, అడిగినన్ని కాల్షీట్స్ ఇవ్వలేని కారణాలతో బాలీవుడ్ భామలను తీసుకోవాలనే ఆలోచనను విరమించుకున్నారు.

అయితే గత కొన్ని రోజులుగా ప్రభాస్ సరసన మరోసారి అనుష్కనే తీసుకునే అవకాశాలు ఉన్నాయంటూ వార్తలు ప్రచురిస్తున్నారు. అయితే చిత్రబృందం మాత్రం ముగ్గురు హీరోయిన్లను ఎంపిక చేసుకున్నారు. ఆ ముగ్గురిలో ఒకరిని ఫైనల్ చేయనున్నారు. ఆ
ముగ్గురు మరెవరో కాదు.. అనుష్క, పూజా హెగ్డే, మంజిమా మోహన్.

అనుష్క పేరుతో పాటు మధ్యలో పూజా పేరు కూడా కాస్త గట్టిగానే వినిపించింది. తాజాగా ఈ లిస్ట్ లోకి మంజిమా మోహన్ చేరింది. ‘సాహసం శ్వాసగా సాగిపో’ సినిమాలో మంజిమా కాస్త లావుగా కనిపించింది. కానీ ఈ మధ్య అమ్మడు బాగానే సన్నబడింది. అంతేకాదు గ్లామరస్‌గా కనిపించడానికి ఎలాంటి కాస్ట్యూమ్స్ వేసుకోవడానికైనా సిద్ధం అంటూ.. ఇటీవల ఓ స్టేట్మెంట్ కూడా ఇచ్చింది.

ఇప్పటికే ‘సాహో’ సినిమా షూటింగ్ మొదలైంది. విలన్‌పై కొన్ని సన్నివేశాలను కూడా చిత్రీకరించారు. త్వరలోనే రామోజీఫిల్మ్ సిటీలో మేజర్ షెడ్యూల్ మొదలుకానుంది. అప్పటికల్లా హీరోయిన్‌ను ఫైనల్ చేసి హీరో హీరోయిన్‌లపై సీన్‌‌లను చిత్రీకరించేందుకు దర్శకుడు సుజీత్ ప్లాన్ చేస్తున్నారు. సో.. మరికొన్ని రోజుల్లోనే హీరోయిన్ విషయంలో స్పష్టత వచ్చే అవకాశం ఉంది.