బాలీవుడ్‌లో ప్రభాస్ ఫ్యాన్ ఫాలోయింగ్‌కి నిదర్శనం

ముంబై ఎయిర్‌పోర్ట్ అంటేనే సెలబ్రిటీల రాకపోకలకి కేంద్రబిందువు లాంటిది. నిత్యం ఎందరో సెలబ్రిటీలు తమ సినిమాల షూటింగ్స్ కోసమో లేక ప్రమోషన్స్ కోసమో ఈ ఎయిర్‌పోర్ట్ వేదికగా ప్రయాణాలు చేస్తుంటారు. అలా ముంబై ఎయిర్‌పోర్టులో తమ కంటపడిన సెలబ్రిటీలని ఎవరినీ అభిమానులు కానీ లేదా మీడియా కానీ ఎవ్వరూ విడిచిపెట్టరనే సంగతి తెలిసిందే. తాజాగా బాహుబలి-2 ప్రమోషన్స్ కోసం ముంబై వెళ్లిన ప్రభాస్‌కి కూడా అక్కడి ఎయిర్‌పోర్టులో అటువంటి పరిస్థితే ఎదురైంది.

ఎయిర్‌పోర్టులో ప్రభాస్‌ని చూసిన ఫ్యాన్స్, మీడియా అతడిని చుట్టుముట్టారు. బాహుబలి స్టార్‌గా బాలీవుడ్ ఆడియెన్స్‌కి, మీడియాకి సుపరిచితుడైపోయాడు ప్రభాస్. దీంతో బాహుబలితో సెల్ఫీలు తీసుకునేందుకు ఎగబడ్డారు అతడి ఫ్యాన్స్. ప్రభాస్ కూడా ఓపిగ్గా వారితో కాసేపు ముచ్చటించి, మీడియా కెమెరాలకి ఓ స్మైల్ ఇచ్చి అక్కడినుంచి వెళ్లిపోయాడు.

ముంబై ఎయిర్‌పోర్టులో అభిమానులు అతడిని రిసీవ్ చేసుకున్న విధానం చూస్తోంటే, ప్రభాస్‌కి బాలీవుడ్‌లోనూ భారీగా ఫ్యాన్ ఫాలోయింగ్ ఏర్పడుతోందని అనిపిస్తోంది. ఏప్రిల్ 28న 'బాహుబలి 2' రిలీజ్ తర్వాత ఈ ఫ్యాన్ ఫాలోయింగ్ ఇంకా ఏ రేంజ్‌కి వెళ్తుందో చూడాలి మరి!!