ఈనెల 23న ప్రియమణి పెళ్లి!

ఒకప్పుడు తెలుగు తెరపై తన హవా కొనసాగించిన హీరోయిన్ ప్రియమణి పెళ్లి పీటలు ఎక్కుతోంది. ఆగస్టు 23న బాయ్ ఫ్రెండ్ ముస్తఫా రాజ్‌ను ప్రియమణి పెళ్లాడనుంది. చాలా కాలంగా చెట్టాపట్టాలేసుకుని తిరుగుతున్న ఈ ప్రేమ పక్షులు గతేడాది నిశ్చితార్థం చేసుకున్నారు. పెళ్లి కూడా వెంటనే ఉంటుందని ప్రకటించారు. కానీ అదికాస్త ఆలస్యమైంది. మొత్తానికి పెళ్లి తేదీని ఖరారు చేసి ఎలాంటి రూమర్లకు తావివ్వకుండా చేశారు ప్రియమణి. ఎలాంటి హంగు ఆర్భాటం లేకుండా రిజిస్టర్ ఆఫీసులో చాలా సింపుల్‌గా పెళ్లి జరగనున్నట్లు సమాచారం.

ఆగస్టు 24న బెంగళూరులోని ఓ స్టార్ హోటల్‌లో రిసప్షన్ ఏర్పాటు చేసినట్లు తెలుస్తోంది. ఈ రిసెప్షన్‌కు సౌతిండియా సినీ తారలు తరలిరానున్నారు. ఇక ముస్తఫా ముంబైకి చెందిన వ్యాపారవేత్త. ఆయణ్ని ప్రియమణి తొలిసారి ఓ డ్యాన్స్ షోలో కలిశారు. ఆ పరిచయం ప్రేమగా మారింది. చాలా ఏళ్లుగా ప్రేమ పక్షులుగానే ఉండిపోయిన ఈ జంట ఇప్పుడు పెళ్లి పీటలు ఎక్కుతోంది. తమిళ సినిమా ‘పరుతివీరన్’లో నటనకు గాను జాతీయ అవార్డు రావడంతో ప్రియమణికి దేశవ్యాప్తంగా మంచి గుర్తింపు వచ్చింది. దీంతో తెలుగు, తమిళ, కన్నడ భాషల్లో ప్రియమణి బిజీ అయిపోయింది.

తెలుగులో పెళ్లైన కొత్తలో, యమదొంగ, నవ వసంతం, రగడ, శంభో శివ శంభో, గోలీమార్ వంటి చిత్రాలతో మంచి గుర్తింపు తెచ్చుకుంది. ద్రోణ సినిమాలో బికినీ వేసుకుని అందాలు ఆరబోసింది. అయితే ఆ తరవాత తెలుగు సినిమాల్లో పెద్దగా నటించలేదు. ‘మన ఊరి రామయణం’ తెలుగులో ఆఖరి సినిమా. కన్నడ, మళయాలంలో బాగానే అవకాశాలు దక్కాయి. ఓ వైపు వెండితెరపై మెరుస్తూనే మరోవైపు బుల్లితెరపై తన హవా కొనసాగిస్తోంది ప్రియమణి. పలు రియాలిటీ షోలు, డ్యాన్స్ షోలలో న్యాయనిర్ణేతగా ప్రియమణి వ్యవహరిస్తోంది.