100 మంది పవర్‌ఫుల్ ఉమెన్ జాబితాలో బాలీవుడ్ బ్యూటీ

తనకి వున్న ఫ్యాన్ ఫాలోయింగ్, క్రేజ్‌ని బాలీవుడ్ నుంచి హాలీవుడ్ వరకు విస్తరించుకున్న ప్రియాంకా చోప్రా తాజాగా ప్రపంచవ్యాప్తంగా వున్న 2017వ సంవత్సరానికిగాను 100 మంది శక్తివంతమైన మహిళల జాబితాలో చోటు సంపాదించుకుంది. జెర్మన్ ఛాన్సెలర్ ఎంజేలా మెర్కెల్ మొదటి ర్యాంకులో నిలిచిన ఈ జాబితాలో ప్రియాంకా చోప్రా 97వ స్థానాన్ని సొంతం చేసుకుంది.

ప్రియాంకా చోప్రాతోపాటు మరో నలుగురు భారతీయ మహిళలకి సైతం ఈ జాబితాలో చోటు దక్కింది. ఐసీఐసీఐ బ్యాంక్ సీఈఓ, ఎండీ చందా కొచ్చర్ 32 వ స్థానంలో, హెచ్‌సీఎల్ కార్పొరేషన్ సీఈఓ రోష్ని నాడార్ మల్హోత్రా 57వ స్థానంలో, బయోకాన్ సంస్థ వ్యవస్థాపకురాలు కిరణ్ మజుందార్ షా 71వ స్థానంలో నిలవగా హెచ్‌టీ మీడియా చైర్‌పర్సన్, ఎడిటోరియల్ డైరెక్టర్ శోభనా భార్తియా 92వ స్థానం సొంతం చేసుకున్నారు. అన్నట్టు బాలీవుడ్ నటి ప్రియాంకా చోప్రాకన్నా కూడా ఈ నలుగురు మహిళలే ఈ జాబితాలో ముందంజలో వుండటం గమనార్హం.