ప్రియాంకా చోప్రా రేంజ్ మరింత పెరిగింది

ఇప్పటివరకు హాలీవుడ్ టీవీ సీరియల్స్, చిత్రాల్లోనే నటించిన ప్రియాంకా చోప్రా ఇప్పుడు మరో అడుగు ముందుకేసి ఓ ఇండో-అమెరికన్ చిత్రాన్ని నిర్మించేందుకు రెడీ అయ్యింది. హాలీవుడ్ ప్రొడ్యూసర్ డేవిడ్ వొమార్క్‌తో కలిసి ''లవ్ సోనియా'' అనే ఇండో-అమెరికన్ చిత్రాన్ని నిర్మించనున్నట్టు తెలుస్తోంది. బాలీవుడ్ మీడియా కథనాల ప్రకారం భారతీయ నేపథ్యంతో తెరకెక్కనున్న ఈ సినిమాను నిర్మించే అవకాశం మొదట కరణ్ జోహర్‌కి వచ్చిందట. కానీ కొన్ని అనుకోని కారణాలతో ఈ చిత్రాన్ని నిర్మించడం తనకి కుదరదు అని భావించిన కరణ్.. హాలీవుడ్ నిర్మాతకి ప్రియాంకా పేరుని సూచించాడట. అలా ప్రియాంకా చోప్రాకు ఈ సినిమాను కో-ప్రొడ్యూస్ చేసే అవకాశం వచ్చింది.

భారతీయ నేపథ్యం వున్న ఇండో-అమెరికన్ సినిమా కావడంతో ప్రమోషన్స్ పరంగానూ తమకి ప్లస్ పాయింట్ అయ్యే విధంగా ఈ సినిమాను ప్రజెంట్ చేసేందుకు కరణ్ జోహర్ చెప్పినట్టుగానే ప్రియాంకా చోప్రాను ఓకే చేసుకున్నారు డేవిడ్ వొమార్క్.

ప్రపంచస్థాయిలో నెట్‌వర్క్ కలిగిన ఓ సెక్స్ రాకెట్‌లో చిక్కుకున్న ఓ భారతీయ గ్రామీణ యువతి జీవితం ఎలాంటి మలుపులు తీసుకుందనేదే ఈ చిత్ర కథాంశం. టీవీ సీరియల్ ఆర్టిస్ట్ మృణాల్ థాకూర్ ఈ సినిమాలో ప్రధాన పాత్ర పోషిస్తుండగా 'స్లమ్ డాగ్ మిలియనీర్' ఫేమ్ ఫ్రీదా పింటోను సహాయ నటిగా ఎంపిక చేసుకున్నారు. డెమీ మూరే మరో ప్రత్యేకమైన పాత్రలో కనిపించనున్నారు.