Jr NTR: మహానటి మూవీలో తారక్‌ను అందుకే తీసుకోలేదు.. సీక్రెట్ బయటపెట్టిన అశ్వనీదత్

తెలుగు సినీ చరిత్రలో తనకంటూ ఓ సువర్ణాధ్యాయాన్ని లిఖించుకున్నారు మహానటి సావిత్రి (Savitri). ఆమె జీవిత కథ ఆధారంగా తెరకెక్కిన మూవీ మహానటి (Mahanati) బాక్సాఫీసు వద్ద బ్లాక్‌బస్టర్ హిట్‌గా నిలిచింది. సావిత్రి పాత్రలో కీర్తి సురేష్ (Keerthy Suresh) జీవించేసింది. ఆమెను తెరపై చూస్తున్నంతసేపు ఆడియన్స్‌కు సావిత్రిని చూస్తున్నట్లే అనిపించింది. సమంత (Samantha), విజయ్ దేవరకొండ (Vijay Devarakonda) కీలక పాత్రల్లో నటించారు. కాగా.. ఈ మూవీలో అక్కినేని నాగేశ్వరరావుగా నాగ చైతన్య (Naga Chaitanya) నటించాడు. ఎన్టీఆర్ (NTR) పాత్రలో జూనియర్ ఎన్టీఆర్ (Jr Ntr) నటిస్తారని ప్రచారం జరిగినా.. ఆయన నటించలేదు. చివరికి ఆ పాత్రను ఎవరూ పోషించలేదు.

తాజాగా ఈ విషయంపై మహానటి మూవీని నిర్మించిన వైజయంతీ మూవీస్ అశ్వనీదత్ (Aswani Dutt) క్లారిటీ ఇచ్చారు. అలీతో సరదాగా షోలో ఆయన మాట్లాడుతూ.. రామారావు గారి పాత్రను జూనియర్ ఎన్టీఆర్ చేయాల్సిందన్నారు. అయితే కొన్ని కారణాల వల్ల కుదరలేదని చెప్పారు. ఎన్టీఆర్ పాత్రకు తారక్ పేరు చెప్పగానే మూవీ యూనిట్ మొత్తం సంతోషం వ్యక్తం చేసిందన్నారు.

అయితే అదే సమయంలో నందమూరి బాలకృష్ట గారు 'ఎన్టీఆర్‌ బయోపిక్‌' ప్రకటించారని అన్నారు అశ్వనీదత్. దీంతో తమ సినిమాలో రామారావు గారి పాత్రలో ఎవరినీ పెట్టి తీసినా ప్రేక్షకులు తప్పుగా భావిస్తారేమోనని అనిపించిందని అన్నారు. ఇదే విషయం నాగ్ అశ్విన్‌కు చెప్పానన్నారు. అయితే మూవీలో ఎన్టీఆర్ క్యారెక్టర్ లేకుండా తీస్తానని నాగీ తనతో చెప్పాడని గుర్తు చేసుకున్నారు. అందుకే మూవీలో ఎన్టీఆర్‌కు సంబంధించి కేవలం ఒక షాట్ మాత్రమే పెట్టామన్నారు. ఎన్టీఆర్ పామును పట్టుకునే సీన్ తీశామని.. అది రామారావు గారి కెరీర్ ఆరంభంలోనే నిజంగానే జరిగిందట అని చెప్పారు అశ్వనీదత్.

ఇటీవలె సీతా రామం మూవీతో ప్రొడ్యూసర్‌గా బ్లాక్‌బస్టర్ హిట్ అందుకున్నారు ఆయన. ప్రస్తుతం పాన్ ఇండియా స్టార్ ప్రభాస్‌ (Prabhas)తో ప్రాజెక్ట్ కె (Project K) మూవీని నిర్మిస్తున్నారు. భారీ బడ్జెట్‌తో రూపొందుతున్న ఈ సినిమా ఇప్పటికే 55 శాతం షూటింగ్ కంప్లీట్ చేసుకుంది. వచ్చే ఏడాది అక్టోబర్ నెలలో రిలీజ్ చేసేందుకు ప్లాన్ చేస్తున్నారు.