Bandla Ganesh: పవన్ కోసం బండ్ల భారీ స్కెచ్.. రంగంలోకి బోయపాటి!

‘నేను ఇకపై సినిమాలు చేయను. నా సమయమంతా ప్రజాసేవకే కేటాయిస్తా’.. ఆంధ్రప్రదేశ్ ఎన్నికల బరిలోకి దిగిన తరవాత జనసేన అధినేత, పవర్ స్టార్ పవన్ కళ్యాణ్ ఈ మాట చాలా సార్లు చెప్పారు. కానీ, తాజా ఎన్నికల్లో జనసేనతో పాటు పవన్ కళ్యాణ్ ఘోరంగా ఓడిపోయారు. ఈ నేపథ్యంలో పవన్ కళ్యాణ్ మళ్లీ సినిమాల్లోకి రీ ఎంట్రీ ఇవ్వబోతున్నారనే చర్చ మొదలైంది. పవన్ కళ్యాణ్‌తో బండ్ల గణేశ్ సినిమా చేయబోతున్నారనే వార్త ఇప్పుడు హాట్ టాపిక్‌గా మారింది. పవన్, బండ్ల గణేశ్ మధ్య సాన్నిహిత్యం ఉంది కాబట్టి ఈ వార్తలో నిజముంది అనేవారూ ఉన్నారు.

ఆర్థిక ఇబ్బందే టార్గెట్..
జనసేన పార్టీని ఏర్పాటుచేసి ఎన్నికల్లో పోటీకి దిగిన పవన్ కళ్యాణ్ తన వద్ద ఉన్న డబ్బంతా ఎన్నికలకే ఖర్చు పెట్టేశారని అంటున్నారు. ప్రస్తుతం జనసేన ఆర్థిక ఇబ్బందుల్లో ఉండట. ఇలాంటి సమయంలో మళ్లీ నిధులు సమకూర్చుకోవడానికి సినిమా చేయడమే సరైన నిర్ణయమని పవన్‌‌కు బండ్ల గణేశ్ సూచిస్తున్నారట. తనతో సినిమా చేస్తే రూ.40 కోట్ల పారితోషికం ఇస్తానని కూడా ఆఫర్ చేశారట. తాను కూడా కాంగ్రెస్‌లో చేరి చేతులు కాల్చుకున్నానని, ఈ సినిమాతో తామిద్దరం గట్టెక్కుదామని పవన్‌ను బండ్ల ఒప్పించే ప్రయత్నం చేస్తున్నారట.

బోయపాటి చేతికి బాధ్యతలు..
ఈ సినిమా బాధ్యతలు దర్శకుడు బోయపాటి శ్రీనుకు గణేశ్ అప్పగించినట్లు వార్తలు వినిపిస్తున్నాయి. ఒక మంచి కమర్షియల్ స్క్రిప్ట్ సిద్ధం చేయమని చెప్పారట. పారితోషికం కింద రూ.10 కోట్లు ఇస్తానని బోయపాటికి ఆఫర్ చేశారట. సినిమాకు మొత్తం బడ్జెట్ రూ.100 కోట్లు కేటాయించారట గణేశ్. పవన్, బోయపాటిలకు పారితోషికాల కింద రూ.50 కోట్లు పోగా మిగిలిన రూ.50 కోట్లతో సినిమాను తెరకెక్కించాలని స్కెచ్ వేశారని తెలుస్తోంది. గతంలో పవన్‌తో బండ్ల గణేశ్ ‘గబ్బర్ సింగ్’ సినిమాను నిర్మించిన సంగతి తెలిసిందే.

వాస్తవానికి, పవన్ ప్రత్యక్ష రాజకీయాల్లోకి అడుగు పెట్టడానికి ముందు కొన్ని పెద్ద నిర్మాణ సంస్థల నుంచి అడ్వాన్స్‌లు కూడా తీసుకున్నారు. కానీ, వారందరితో తాను సినిమాలు చేయలేనని గతంలో చెప్పేశారట. అయినప్పటికీ, ప్రస్తుతం పవన్ పరిస్థితిని గమనించిన వారంతా మళ్లీ ప్రయత్నాలు మొదలుపెట్టారని అంటున్నారని. బండ్ల గణేశ్ ఒకడుగు ముందుకేసి పక్కా స్కెచ్ రచించారని సమాచారం.

ఏదేమైనా, పవన్ మళ్లీ సినిమాల్లోకి రావడం సాధ్యమా అనే అనుమానం కలుగుతోంది. ఎన్నికల్లో ఘోరంగా ఓడిన నేపథ్యంలో జనసేన పార్టీ భవిష్యత్తు కార్యచరణ రూపొందించుకోవాల్సిన అవసరం ఉంది. వచ్చే ఐదేళ్లలో పార్టీని మళ్లీ ప్రజల్లోకి తీసుకెళ్లాలి. ప్రభుత్వాన్ని టార్గెట్ చేస్తూ సమస్యలను ఎత్తిచూపాలి. ప్రజలకు జనసేనపై నమ్మకాన్ని కలుగజేయాలి. కాబట్టి, వచ్చే ఎన్నికల్లో జనసేన గెలవడానికి చాలా కష్టపడాలి. ఇలాంటి సమయంలో పార్టీ పనులను వదిలిపెట్టి పవన్ సినిమాలవైపు వెళ్తారా? అంటే కష్టమనే అనిపిస్తోంది.