Balakrishna: కేసీఆర్ దగ్గరకు పిలవలేదని.. జగన్ వద్దకు పిలిచినా రానని.. బాలయ్యా వాట్ ఈజ్ దిసయ్యా!

‘ఏ.. ఎవరైనా నన్ను పిలిచారా?? ఇండస్ట్రీలో ఇంత జరగుతుంది ఒక్కడైనా నన్ను రమ్మని పిలిచారా?? తలసాని వీళ్లు ఆస్తులు పంచుకోవడానికే చర్చలు.. ఏదో టీవీల్లో చూస్తే తప్ప నాకు మీటింగ్ జరిగినట్టు తెలియదు’ అంటూ బాలయ్య.. ఇటీవల ఇండస్ట్రీ పెద్దలు తెలంగాణ ప్రభుత్వంతో జరిపిన చర్చలపై చేసిన కామెంట్ తీవ్ర దుమారాన్ని రేపాయి. ఈ ఇష్యూలో నాగబాబు జోక్యం చేసుకుని బాలయ్యపై నిప్పులు చెరగడంతో మెగా ఫ్యాన్స్, నందమూరి ఫ్యాన్ రెండు గ్రూపులుగా విడిపోయి రచ్చ రచ్చే చేశారు.

అయితే అయ్యిందేదో అయ్యింది.. కేసీఆర్‌తో మీటింగ్‌కి పిలవకపోయినా, జగన్‌తో ఈనెల 9న జరిగే మీటింగ్‌కి బాలయ్యను పిలవడం ప్రాధాన్యత సంతరించుకుంది. బాలయ్య హీరో అన్న సంగతి పక్కన పెడితే.. ఆయన ప్రతిపక్ష పార్టీ ఎమ్మెల్యే.. అందులోనూ తండ్రి ఎన్టీఆర్ స్థాపించిన తెలుగుదేశం పార్టీకి అధికారం దూరం చేసిన జగన్‌తో భేటీ అవుతారా? అంటే అది జరగని పని. అందులోనూ చిరంజీవితో కలిసి వెళ్లాలంటే ఆయన అహం అడ్డువచ్చినా రావచ్చు. అందుకే రెండో ఆలోచన లేకుండా రానని చెప్పేశారు బాలయ్య.

శనివారం నాడు మూవీ మొగల్ డి రామానాయుడు జయంతి సందర్భంగా మీడియాతో మాట్లాడిన నిర్మాత సీ కళ్యాణ్.. 9న జరిగే ఏపీ ముఖ్యమంత్రి జగన్‌తో జరిగే కీలక భేటీకి బాలయ్యను తానే స్వయంగా ఆహ్వానించినట్టు తెలిపారు. ఆయన మాట్లాడుతూ.. కరోనా వల్ల చలన చిత్ర రంగం ఎదుర్కొంటున్న ఇబ్బందులపై చర్చించడానికి ఆంధ్రప్రదేశ్ ముఖ్యమంత్రి వైఎస్ జగన్‌ను ఈనెల 9 మధ్యాహ్నం 3 గంటలకు కలవబోతున్నాం. చిరంజీవి గారు జగన్ గారితో మాట్లాడి అపాయింట్ మెంట్ తీసుకున్నారు. ఇండస్ట్రీని అంతా తీసుకుని వెళ్తున్నాం. అందరితో పాటు బాలకృష్ణ గారిని ఆహ్వానించడం జరిగింది. నేను పిలిచా.. అయితే ఆయనది 60 వ పుట్టినరోజు జూన్ 10న కావడంతో ఉదయాన్నే పూజలు ఉంటాయి. టైం కుదరదు మీరు వెళ్లి రండి అని చెప్పారు. సో.. 9న జరిగే భేటీకి బాలయ్య బాబు రావడం లేదు. ఆయన రానన్నారని మాలో గ్రూపుల్లేవు. విభేదాల్లేవు. కేవలం ఆయనకు సమయం కుదరకపోవడం వల్లే రావడం లేదు’ అని చెప్పుకొచ్చారు సీ. కళ్యాణ్.

అయితే నిన్నటి వరకూ నన్ను పిలవలేదు.. నన్ను రమ్మనలేదు అంటూ నానా హంగామా చేసిన బాలయ్య.. ఇప్పుడు కీలకభేటీకి పిలిచినా రానని కుండబద్దలుకొట్టేయడంతే మెగా ఫ్యాన్స్ టార్గెట్ చేస్తున్నారు. ఒకవైపు కరోనా ఉంటే బర్త్ డే సంబరాలు కావాల్సి వచ్చాయా?? ఇండస్ట్రీ గురించి అవసరం లేదా? అంటూ సోషల్ మీడియాలో పోస్ట్‌లు పెడుతున్నారు.

Read Also: నన్నంటే నేను ఊరుకుంటా.. నా తమ్ముళ్లు ఊరుకోరు కడిగేస్తారు: చిరంజీవి వార్నింగ్