కార్తికేయ-2 మంచి విజయాన్ని సాధించింది
కార్తికేయ-2 మూవీ ఇండియా వైడ్‌గా మంచి విజయం సాధించిందని దిల్ రాజు అన్నారు. జూన్, జులై నెలల సినీ ఇండస్ట్రీని భయపెట్టాయని.. ఈ నెలలో బింబిసార, సీతా రామం, కార్తికేయ-2 సినిమాలు మళ్లీ ఊపిరిపోశాయని అన్నారు. ''ఈ మూవీ రిలీజ్‌కు ముందు నుంచి నిఖిల్‌తో నాతో మాట్లాడుతూనే ఉన్నాడు. నేను డైరెక్టర్ చందుకు ఫోన్ చేసి థ్యాంక్ యూ మూవీ జులై 22 డేట్స్ ఇవ్వాలని అడిగా.. తరువాత నిఖిల్, వివేక్ మా ఇంటికి వచ్చి మాట్లాడారు. మా మధ్య ఎంతో హెల్తీ రిలేషన్‌షిప్ ఉంది
చాలా బాధగా ఉంది..
కానీ కొందరు మా రిలేషన్‌షిన్‌ను బయటకు తీసుకువెళ్లి వేరేగా తీసుకువెళ్లి.. గ్యాప్స్ క్రియేట్ చేస్తారు. ఇలా సక్సెస్ రోజు నేను ఇలా మాట్లాడడం చాలా బాధగా ఉంది. నేను ఇప్పుడు మాట్లాడకపోతే మా మధ్య ఏదో ఉందని రాస్తారు. జులై 22 నుంచి మరో తేదీకి వెళతామని నిఖిల్, చందు అన్నారు. నేను వాళ్లకు థ్యాంక్స్ కూడా చెప్పాను. అక్కడితో సమస్య అయిపోయింది. తరువాత వాళ్లు ఆగస్టు 12కు వద్దామని అనుకున్నారు. ఈలోపే ఎవరికీ తోచింది వాళ్లు రాస్తున్నారు. సినిమాను తొక్కేస్తున్నారని ఏదేదో రాసేశారు.
డేట్స్ క్లాష్ అవ్వకుండా చూసుకోమన్నా..
ఇండస్ట్రీలో ఉన్నవాళ్లు ఎవరూ సినిమాలను తొక్కుకోరు. సినిమా బాగా ఆడితే మేం ఆనందపడతాం. సినిమా బాగా ఆడితే అది మాకు ఊపిరిపోస్తుంది. క్లిక్స్‌, వ్యూస్ కోసం మమ్మల్ని బలి పశువులను చేయొద్దు. ఇంతకు ముందు కూడా నాపైనా ఇలాంటివి చాలా వచ్చాయి. నేను ఎప్పుడు ఓపికతో ఉంటాను. మళ్లీ చందు నా దగ్గరకు వచ్చి ఆగస్టు 12న వేరే సినిమాలు ఉన్నాయని అన్నారు. ప్రొడ్యూసర్స్‌తో మాట్లాడుకుని డేట్స్ క్లాష్ అవ్వకుండా ఒక రోజు అటు ఇటు చూసుకుని రండి అని నేను ఒక సలహా మాత్రమే ఇచ్చాను. కానీ ఈలోపే రాద్దాంతం మొదలుపెట్టారు.
తెలియకపోతే మమ్మల్ని అడగండి..
సినిమాను ఎవడైనా తొక్కుతాడా..? మీకు తెలియకపోతే తెలుసుకోవడానికి ట్రై చేయాలి. ఏం తెలియకుండా రాళ్లు వేయకండి. నేను తప్పు చేస్త క్షమించమని అడుగుతాను. నేను సినిమా కోసం ప్రాణం ఇస్తా. సినిమా బాగోలేదంటే నేను నా భూజాలపై వేసుకుంటా.. ఇకనైనా తెలుసుకుని వాస్తవాలు రాయండి. మీకు తెలియకపోతే మమ్మల్ని అడగండి. లేకపోతే మూసుకుని ఉండండి..'' అంటూ దిల్ రాజు ఘాటుగా మాట్లాడారు. తాను ప్రీ రిలీజ్ ఈవెంట్‌కు రావాల్సిందని.. కానీ తనకు ఫీవర్ ఉండడంతో రాలేకపోయానని చెప్పారు.