God Father: చిరంజీవి అమ్ముడుపోలేదు.. ప్రజా రాజ్యంతో అప్పులు.. ఆనాటి విషయాలు బయటపెట్టిన నిర్మాత ఎన్వీ ప్రసాద్

మెగాస్టార్ చిరంజీవి (Megastar Chiranjeevi)-డైరెక్టర్ మోహన్ రాజా (Mohan Raja) కాంబోలో వచ్చిన 'గాడ్ ఫాదర్' (GodFather) మూవీ బ్లాక్‌బస్టర్ హిట్ టాక్‌ సొంతం చేసుకుంది. భారీ వసూళ్లతో బాక్సాఫీసు వద్ద దూసుకుపోతోంది. ఈ మూవీకి సూపర్ హిట్ టాక్ రావడంతో మెగాభిమానులు సంబరాలు అంబరాన్ని అంటాయి. ఈ నేపథ్యంలోనే గాడ్ ఫాదర్ మూవీ సక్సెస్ మీట్‌ (God Father Blockbuster Success Meet)ను హైదరాబాద్‌లో గ్రాండ్‌గా నిర్వహించారు. ఈ కార్యక్రమానికి చిరంజీవితో పాటు చిత్రబృందం కూడా హాజరైంది.

ఈ సందర్భంగా ప్రొడ్యూసర్ ఎన్వీ ప్రసాద్ (NV Prasad) ఆసక్తికర విషయాలు వెల్లడించారు. 'ఈ రోజు ప్రపంచం మొత్తం రాముడు ఎవరంటే చరణ్ బాబు. మేం చిరంజీవి తరువాత రామ్ చరణ్‌ను ఫాలో అవుతున్నాం. ప్రజా రాజ్యం పార్టీ పెట్టినప్పుడు చిరంజీవి గారు తిరుపతిలో పోటీ చేసినప్పుడు ఎన్నికలు మొత్తం మేమే చూసుకున్నాం. లోకల్ లీడర్స్‌తో మాట్లాడి అందరినీ సమన్వయం చేశాం.

చాలా మందికి తెలియని ఓ విషయం ఉంది. ప్రజా రాజ్యం పార్టీతో చిరంజీవి గారు ఎంత ఇబ్బంది పడ్డారో మాకు తెలుసు. మీకెవ్వరికి తెలియని నగ్నసత్యం సార్‌కు చెప్పకుండా మీకు చెబుతున్నా. ఆయన గురించి చాలామంది అమ్ముడు పోయారని అంటున్నారు. మీకెవ్వరికి తెలియదు. మద్రాసు ల్యాబ్ పక్కన ఉండే కృష్ణ గార్డెన్ ప్రాపర్టీని అమ్మి ప్రజా రాజ్యం పార్టీ క్లోజ్ చేసే రోజు అప్పులు తీర్చారు. అంతపెద్ద ప్రాపర్టీ అమ్మిన వ్యక్తి ఆయన. ఈ విషయం ప్రపంచానికి తెలియదు.

ఆయన కష్టంతో ఫ్యామిలీ మొత్తం.. ఇండస్ట్రీ మొత్తం ఉంది. ఈరోజుకు కూడా ఉదయం 5 గంటలకు నిద్రలేచి పని చేసే వ్యక్తి గురించి ఎవరు పడితే వాళ్లు మాట్లాడుతున్నారు. ఏది పడితే అది రాస్తునే ఉన్నారు. ధైర్యం ఉంటే నా గురించి రాయమని చెప్పండి. నా గురించి ఎవరు రాయరు. చిరంజీవి స్పెషల్ పర్సన్ కాబట్టి అందరి దృష్టిలో ఆయనే.

కళ్యాణ్ బాబును మీరు ఏం అన్నా.. తను పట్టించుకోరు. కానీ చిరంజీవి గారిని ఏమైనా అంటే.. కళ్యాణ్ బాబు నేరుగా రోడ్డు మీదకు వచ్చేస్తారు. ప్రజా రాజ్యం పార్టీ బాధ, ఆవేశం నుంచి పుట్టిన పార్టీనే ఈ రోజు జనసేన. ఆ రోజు చిరంజీవి గురించి ఏదంటే ఏది మాట్లాడిన వాటికి సమాధానమే జనసేన. దయచేసి ఒక వ్యక్తి గురించి మాట్లాడే ముందుగానీ.. రాసే ముందుగానీ ఒక సెకెండ్ ఆలోచించండి.

గాడ్ ఫాదర్ ఇంత పెద్ద విజయం సాధించడంతో చరణ్ బాబుది ప్రముఖ పాత్ర పోషించాడు. చరణ్ బాబు వల్లే ఈ రోజు ఈ సినిమా వచ్చింది. ఫ్యాన్స్ తలెత్తుకుని చెప్పండి. ఇలాంటి సినిమా రిమేక్ చేసి హిట్ కొట్టే ధైర్యం ఇండస్ట్రీలో ఎవరికి ఉందో మీరు పబ్లిక్‌గా డిబేట్ పెట్టుకోండి. నేను ఎక్కడికి కావాలో వస్తా. ఇటువంటి సినిమా తీసి హిట్ కొట్టడం చిన్న విషయం కాదు. సల్మాన్ ఖాన్ పక్కన నిలబడే అవకాశం చరణ్ బాబు వల్లే వచ్చింది..' అంటూ ఎన్వీ ప్రసాద్ చెప్పుకొచ్చారు.