నాగబాబు అద్దంలో చూసుకో.. నీకు బాలయ్యతో పోలికా?

సమయం సందర్భంలేకుండా వీలు దొరికినప్పుడల్లా బాలయ్యను టార్గెట్ చేస్తున్నారు మెగా బ్రదర్ నాగబాబు. అసలు బాలయ్య ఎవరో తనకు తెలియదు అంటూ బాంబ్ పేల్చిన నాగబాబు.. ఈ తరువాత ఆయనో పెద్ద కమెడియన్ అంటూ నందమూరి ఫ్యాన్స్‌కి ఆగ్రహం తెప్పించే వ్యాఖ్యలు చేశారు. అనంతరం తాను బాలయ్యను ఎందుకు టార్గెట్ చేస్తున్నానో కారణాలు వివరించిన నాగబాబు గతంలో బాలయ్య చిరంజీవిని మెగాఫ్యామిలీని కించపరిస్తూ చేసిన కామెంట్స్‌కి కౌంటర్లు అంటూ వరుస వీడియోలను రిలీజ్ చేశారు. దీంతో నాగబాబు వర్సెస్ బాలయ్యగా మారిన ఈ వివాదంపై టాలీవుడ్‌లో పెద్ద చర్చే నడిచింది.

కాగా అసలు బాలయ్యతో నాగబాబుతో పోలిక ఏంటి అంటూ ఫైర్ అయ్యారు టాలీవుడ్ నిర్మాత ప్రసన్న కుమార్. ఓ మీడియా ఛానల్‌తో ఈ వివాదంపై మాట్లాడిన ఆయన నాగబాబుపై సంచలన కామెంట్స్ చేశారు. ఇండస్ట్రీలో అప్పుడు ఇప్పుడు హీరోల మధ్య మంచి స్నేహపూర్వకమైన వాతావరణం ఉంది. చిరంజీవి, బాలయ్యలు మంచి స్నేహితులు అది ఇప్పటికీ కొనసాగిస్తున్నారు. మధ్యలో నాగబాబు ఇద్దరి మధ్య వైరం కల్పించే వ్యాఖ్యలు చేయడంతో నాగబాబుని బాలయ్యతో పోల్చుతున్నారు. అసలు బాలయ్యతో పోల్చే స్థాయి నాగబాబుకి లేదు. చిరంజీవి, బాలయ్యలు సమఉజ్జీలు అనడంలో అర్ధం ఉంది. కాని నాగబాబుకి ఆ స్థాయి లేదు.

అనవసరంగా ఇలాంటి వ్యాఖ్యలు నాగబాబు ఎందుకు చేస్తున్నారో అర్ధం కావడం లేదు. ఆయన కామెంట్స్‌తో వరుణ్ తేజ్ సినిమాలపై ప్రభావం పడే అవకాశం ఉంది. ఒకసారి అద్దం ముందు నిలబడి తాను చేస్తుంది కరెక్టా? కాదా అని తనను తాను ప్రశ్నించుకోవాలి. చిరంజీవి సోదరిడిగా.. మా అసోసియేషన్ సభ్యుడిగా ఉన్న నాగబాబుకి బాలయ్య ఎవరో తెలియదనడం ఆయన విచక్షణకే వదిలేస్తున్నాం’ అన్నారు ప్రసన్న కుమార్.