Eva Hospital Defamation: ముగిసిన సమంత ‘యశోద’ మూవీ వివాదం.. పేరుని తొలగిస్తున్నట్లు నిర్మాత ప్రకటన

సమంత (Samantha) లీడ్ రోల్ పోషించిన ‘యశోద’ మూవీపై ఇటీవల చెలరేగిన వివాదం (Yashoda Movie Controversy) సమసిపోయింది. నవంబరు 11న థియేటర్లలోకి వచ్చిన యశోద మూవీ హిట్ టాక్‌ని సొంతం చేసుకుని రూ.30 కోట్లకి పైగా వసూళ్లని రాబట్టింది. సరోగసీ బ్యాక్‌డ్రాప్‌తో వచ్చిన ఈ సినిమా ఐదు భాషల్లో పాన్ ఇండియా మూవీగా రిలీజైన విషయం తెలిసిందే. కానీ.. త్వరలోనే ఓటీటీలోకి రాబోతున్న యశోద మూవీపై అభ్యంతరం వ్యక్తం చేసిన ఈవా హాస్పిటల్ యజమాన్యం ఇటీవల రూ.5 కోట్లకి పరువు నష్టం (Eva Hospital Defamation) దావేసింది. అలానే ఈ సినిమా ఓటీటీలో రిలీజ్ కాకుండా ఆపాలని డిమాండ్ చేసింది.అసలు వివాదం ఏంటంటే? యశోద మూవీలో ఈవా అనే సరోగసీ సెంటర్‌లో క్రైమ్ జరిగినట్లు చూపించారు. వాస్తవానికి ఇవా పేరుతో నిజంగానే ఓ హాస్పిటల్ ఉంది. దాంతో సినిమాలో తమ హాస్పిటల్ పేరుని వాడటం ద్వారా పరువు తీశారని ఇవా ఆసుపత్రి యాజమాన్యం పరువు నష్టం దావా వేసింది. ఆ దావాలో సమంత పేరుతో పాటు డైరెక్టర్లు హరి, హరీష్, ప్రొడ్యూసర్ శివలెంక కృష్ణ ప్రసాద్‌ (Sivalenka Krishna Prasad) పేర్లని కూడా చేర్చింది. అయితే.. వారం వ్యవధిలోనే ప్రొడ్యూసర్, ఆసుపత్రి యాజమాన్యం మధ్య రాజీ కుదరడంతో సమస్య తొలగిపోయింది.

సమస్య పరిష్కారం ఎలా? సినిమాలో ఇకపై ఈవా పేరు, లొగో కనిపించకుండా బ్లర్ చేయబోతున్నారు. థియేటర్‌లోనే ఓటీటీలో రిలీజ్ చేయబోతున్న వెర్షన్ కూడా ఈ మేరకు మార్పులు చేస్తామని ప్రొడ్యూసర్ శివలెంక కృష్ణ ప్రసాద్‌ స్పష్టం చేశారు. దాంతో.. ఈవా హాస్పిటల్ యాజమాన్యం కూడా అందుకు ఒప్పుకుంది.

యశోద మూవీలో ఈవా పేరు వాడటంతో తాము హర్ట్ అయ్యామని ఆ హాస్పిటల్‌ ఎండీ మోహన్‌ రావు వెల్లడించారు. సినిమా వాళ్లు డాక్టర్ ప్రొఫెషన్‌ని గౌరవించాలని సూచించిన ఆయన.. గతంలో ఠాగూర్ సినిమాలో ఉన్న సీన్‌ని కూడా గుర్తు చేసుకున్నారు. ఇప్పటికీ ఆసుపత్రిల్లో ఏదైనా జరిగితే ఠాగూర్ సినిమాలో చూపించినట్లు జరిగింది అని అంటున్నారు. అది సినిమా పవర్ అంటూ చెప్పుకొచ్చారు. ఓవరాల్‌గా చాలా వేగంగానే ప్రొడ్యూసర్ శివలెంక కృష్ణ ప్రసాద్‌ సమస్యని పరిష్కరించారని మోహన్‌ రావు స్పష్టం చేశారు.

యశోద మూవీ రిలీజ్‌కి కొన్ని రోజుల ముందు సమంత తాను ‘మయోసైటిస్’ అనే దీర్ఘకాలిక వ్యాధితో గత కొంతకాలంగా బాధపడుతున్నట్లు సోషల్ మీడియా ద్వారా ప్రకటించింది. అయినప్పటికీ.. ఆ వ్యాధికి చికిత్స తీసుకుంటూనే యశోద మూవీలో సమంత స్టంట్స్, పైట్స్ చేసిన విషయం తెలిసిందే.

• Read Latest Telugu Movies News , Telugu News