పూరీ ‘హగ్’కి స్పందన అదుర్స్!

డైరెక్టర్ పూరీ జగన్నాథ్ అంటే మనకు గుర్తొచ్చేది ఆయన సినిమాల్లోని హీరోయిజం. ఆయన హీరోలు అదో రకంగా ఉంటారు. డైలాగులు లాగి కొట్టినట్లు ఉంటాయి. అందుకే ఆయన హిట్టు, ఫ్లాపులతో సంబంధంలేకుండా పూరీ సినిమాలంటే పడిచచ్చే వాళ్లు చాలా మందే ఉన్నారు. కానీ ఆయన రూటు మార్చారు. తన మార్క్ మాస్ స్టైలును పక్కన పెట్టి ఓ సందేశాత్మక లఘు చిత్రాన్ని విడుదల చేశారు. చెట్లు మనకు ఎంత అవసరమో, వాటిని కాపాడుకోవాల్సిన బాధ్యత మనకు ఎంతుందో తెలియజేస్తూ పూరీ నిర్మించిన ‘హగ్’ షార్ట్ ఫిల్మ్ ఇప్పుడు యూట్యూబ్‌లో దూసుకుపోతోంది. ఒక్కరోజులో ఏకంగా మూడు లక్షల వ్యూస్‌ను ఈ షార్ట్ ఫిల్మ్ సాధించింది.

ఒక చెట్టును కౌగిలించుకున్న నగ్న యువతి ఫొటోతో పూరీ విడుదల చేసిన ‘హగ్’ టీజర్ అందరి దృష్టిని ఆకర్షించింది. కొంతమంది దీనిపై సెటైర్లు వేసినా.. ఈ షార్ట్ ఫిల్మ్ చూసిన తరవాత తమ ఆలోచన తప్పు అని అనుకోకమానరు. టీజర్‌తో కొద్ది రోజులుగా అభిమానులను ఊరిస్తున్న పూరీ.. ఆదివారం ఈ షార్ట్‌ఫిల్మ్‌ను యూట్యూబ్‌లో పెట్టారు. అందమైన చెట్లు, వాటిని కౌగిలించుకున్న అమ్మాయిలు, అబ్బాయిలు.. వెనుక అమ్మాయి గొంతుతో వాయిస్ ఓవర్. ఇదే ఉంది షార్ట్‌ఫిల్మ్‌లో.. కానీ ఆ వాయిస్ ఓవర్‌లో ఓ మెసేజ్ ఉంది. చెట్ల వల్ల మనిషికి ఎంత ఉపయోగమో వాయిస్ ఓవర్ ద్వారానే చెప్పారు.

‘చెట్లు వైఫై సిగ్నల్స్‌ను ఇచ్చినట్లయితే మీరు చాలా ఎక్కువ మొక్కలను నాటతారు. కానీ, అవి చాలా చెడ్డవి మనకు పీల్చుకోవడానికి ఆక్సిజన్‌ను మాత్రమే అందిస్తున్నాయి’ అని చెప్పడంలోనే పూరీ మార్క్ కనిపించింది. మొత్తానికి పూరీ మూడున్నర నిమిషాల వ్యవధిలో మనసుకు హత్తుకునే సందేశాత్మక లఘుచిత్రాన్ని అందించారు. అందుకే దీనికి నెటిజన్ల నుంచి మంచి స్పందన వస్తోంది. పూరీకి కృతజ్ఞతలు తెలుపుతూ బోలెడన్ని కామెంట్లు కూడా వస్తున్నాయి. అయితే ఆయన్ను విమర్శించేవారూ లేకపోలేదు. ఇప్పుడు షార్ట్ ఫిల్మ్ తీసిన పూరీ.. కొన్నాళ్లకు ఆర్జీవీలా అయిపోతాడని సెటైర్లు వేస్తున్నారు.