బాలకృష్ణ సినిమాతో పూరి కూతురు సినీరంగ ప్రవేశం

బసవతారకరామపుత్ర బాలకృష్ణ 101 సినిమాను తెరకెక్కిస్తున్న దర్శకుడు పూరి జగన్నాథ్ పనిలో పనిగా ఈ సినిమాతోనే తన కూతురు పవిత్రను కూడా సినీ పరిశ్రమకి పరిచయం చేస్తున్నారట. అయితే, చాలా మంది అనుకుంటున్నట్టుగా పవిత్ర ప్రస్తుతానికి నటన సైడ్ కాకుండా డైరెక్షన్ సైడ్ తన తొలి అడుగులు వేస్తున్నట్టు తెలుస్తోంది.

లేటెస్ట్ అప్‌డేట్స్ ప్రకారం ఆల్రెడీ పవిత్ర ఈ సినిమాకు పూరి వద్ద అసిస్టెంట్ డైరెక్టర్‌గా చేరి పని నేర్చుకుంటున్నట్టు సమాచారం. నటి చార్మి కూడా ఈ సినిమాకు అసిస్టెంట్ డైరెక్టర్‌గా పని చేస్తూ మరిన్ని మెళకువలు నేర్చుకుంటోందట.

ప్రస్తుతం పోర్చుగల్ లో బాలకృష్ణ, శ్రియలపై పలు పాటల చిత్రీకరణ జరుపుతున్నారు. ఆ తర్వాత కొన్ని యాక్షన్ సీక్వెన్స్ తెరకెక్కిస్తే ఇక షూటింగ్ కి ప్యాకప్ చెప్పొచ్చని జగన్ యూనిట్ భావిస్తోంది. పూర్తి మాస్ ఎంటర్‌టైనర్‌గా తెరకెక్కుతున్న ఈ సినిమాలో బాలకృష్ణని స్టైలిష్ అవతార్‌లో చూపిస్తున్నాడు జగన్.