‘గరుడవేగ-2’ కోసం వెయిటింగ్: పీవీ సింధు

రాజశేఖర్ హీరోగా నటించిన ‘పీఎస్‌వీ గరుడవేగ’ సినిమా అద్భుతంగా ఉందని ప్రముఖ బ్యాడ్మింటన్ ప్లేయర్, తెలుగుతేజం పీవీ సింధు చెప్పారు. సినిమా మొత్తం చాలా ఆసక్తికరంగా ఉందన్నారు. శనివారం ఆమె ఈ సినిమాను వీక్షించారు. సింధు కోసం ‘గరుడవేగ’ టీం ప్రత్యేక ప్రదర్శనను ఏర్పాటుచేసింది. ఈ షోకి సింధుతోపాటు ఆంధ్రా క్రికెట్ అసోసియేషన్ మాజీ చైర్మన్ చాముండేశ్వరీనాథ్ కూడా హాజరయ్యారు. షో అనంతరం పీవీ సింధు మాట్లాడారు.

‘సినిమా చాలా బాగుంది. మొదలు నుంచి చివరి వరకు ఎంతో ఆసక్తికరంగా ఉంది. తరవాత ఏం జరగబోతోందనే ఉత్సుకత కనిపించింది. ఇంత మంచి సినిమాను అందించిన రాజశేఖర్ గారితో పాటు మొత్తం టీంకి నా అభినందనలు. ముఖ్యంగా రాజశేఖర్ గారు అద్భుతంగా నటించారు. చాలా బాగా చేశారు. సినిమా కోసం ప్రతి ఒక్కరు ఎంతో బాగా పనిచేశారు. ఈ సినిమా ఆసక్తికరమైన థ్రిల్లర్. పార్ట్-2 కోసం నేను వెయిట్ చేస్తున్నాను’ అని ‘గరుడవేగ’ బృందంపై సింధు ప్రశంసల జల్లు కురిపించారు.

కాగా, హీరో రాజశేఖర్‌కు చాలా కాలం తరవాత ఓ మంచి హిట్ లభించింది. నవంబర్ 3న విడుదలైన ఈ సినిమా ఇప్పటికీ విజయవంతంగా ప్రదర్శితమవుతోంది. దర్శకుడు ప్రవీణ్ సత్తారుకు ఈ సినిమా మంచి గుర్తింపును తెచ్చిపెట్టింది. అదిత్ అరుణ్, పూజా కుమార్, శ్రద్ధాదాస్, కిషోర్ తదితరులు నటించిన ఈ యాక్షన్ థ్రిల్లర్‌ జ్యోస్టార్ ఎంటర్‌ప్రైజెస్ సంస్థ నిర్మించింది.