​ఆ సినిమా ‘మగధీర’కు కాపీ .. విడుదల ఆపండి..!

సుశాంత్ సింగ్ రాజ్ పుత్, కృతీ సనన్ హీరోహీరోయిన్లుగా రూపొందిన హిందీ సినిమా ‘రాబ్తా’ విషయంలో టాలీవుడ్ నుంచి అభ్యంతరాలు వ్యక్తం అవుతున్నాయి. ఈ సినిమా తమ సినిమాకు కాపీ అని ప్రముఖ నిర్మాత అల్లు అరవింద్ అంటున్నారు. తమ అనుమతి లేకుండా తమ కథను కాపీ కొట్టారని.. కాబట్టి ఈ సినిమా విడుదలను ఆపాలని ఆయన అంటున్నారు. ఈ మేరకు హైదరాబాద్ సిటీ సివిల్ కోర్టులో ఆయన వ్యాజ్యం దాఖలు చేయడం ఆసక్తికరంగా మారింది.


ఇటీవలే ‘రాబ్తా’ ట్రైలర్ విడుదల అయ్యింది. దాన్ని చూసిన వారు రామ్ చరణ్, కాజల్ హీరోహీరోయిన్లుగా ఎస్ఎస్ రాజమౌళి దర్శకత్వంలో రూపొందిన ‘మగధీర’ సినిమాతో పోలిక పెట్టారు. ఇంతలోనే ఆ సినిమా తమ సినిమాకు కాపీ అని మగధీర నిర్మాత అల్లు అరవింద్ కోర్టుకు ఎక్కారు. ఆయన వ్యాజ్యాన్ని విచారణకు తీసుకున్న కోర్టు.. తదుపరి విచారణను జూన్ ఒకటికి వాయిదా వేసింది.

జూన్ తొమ్మిదిని ‘రాబ్తా’ విడుదల తేదీగా ప్రకటించారు. ఈ నేపథ్యంలో కోర్టు ఈ వ్యవహారంపై ఎలాంటి తీర్పునిస్తుందనేది ఆసక్తికరంగా మారింది. ‘మగధీర’ సినిమా తెలుగులో పెద్ద హిట్ గా నిలిచిన సంగతి తెలిసిందే.