లీగల్ ఫైట్‌లో ఓడిపోయిన 'మగధీర'

టాలీవుడ్ బాక్సాఫీస్ ఫైట్‌లో కలెక్షన్ల వర్షం కురిపించి తన సత్తా చాటుకున్న 'మగధీర' సినిమా ఓ బాలీవుడ్ చిత్రంతో జరిగిన లీగల్ ఫైట్‌లో మాత్రం ఓడిపోయింది. తాము తెరకెక్కించిన మగధీర సినిమాను చూసే రాబ్తా సినిమాను కాపీ కొట్టారంటూ మగధీర సినిమా నిర్మాతలు రాబ్తా మూవీ విడుదలకి వ్యతిరేకంగా కోర్టుని ఆశ్రయించిన సంగతి తెలిసిందే.

అయితే, ఈ కేసులో మగధీర నిర్మాతలు ఆరోపిస్తున్నట్టుగా రెండు సినిమాల మధ్య కథ, కథనం, సన్నివేశాలు, స్టోరీ లైన్, ఫారెన్ లొకేషన్స్, పాత్రల తీరు తెన్నులు, క్లైమాక్స్ విషయంలో ఏ విధంగాను సారూప్యత లేదని రాబ్తా సినిమా తరపున వాదనలు వినిపించిన లాయర్లు కోర్టుకి విన్నవించారు. అనేక విషయాలలో ఈ రెండు సినిమాల మధ్య తేడాలు చాలా వున్నాయని, అటువంటప్పుడు మగధీర సినిమాకు రాబ్తా కాపీ ఎలా అవుతుందని వారు బుధవారం కోర్టు దృష్టికి తీసుకొచ్చారు.

రాబ్తా తరపు న్యాయవాదుల వాదనలతో ఏకీభవించిన మగధీర నిర్మాతలు రాబ్తా సినిమా విడుదలకి వ్యతిరేకంగా దాఖలు చేసిన పిటీషన్‌ని గురువారం ఉదయం ఉపసంహరించుకున్నట్టు రాబ్తా మూవీ డైరెక్టర్ దినేష్ విజన్ తెలిపారు. దీంతో రేపు విడుదల కావాల్సి వున్న రాబ్తా సినిమాకు న్యాయపరమైన చిక్కులు తొలగిపోయాయి. సుశాంత్ సింగ్ రాజ్‌పుత్, కృతిసనన్ జంటగా తెరకెక్కిన రాబ్తా మూవీ రేపే ఆడియెన్స్ ముందుకు రానుంది.