మనసున్న మారాజు ‘లారెన్స్’

రాఘవలారెన్స్ ఒక డాన్సర్‌‌గా, దర్శకుడిగానే కాకుండా ఉన్నత వ్యక్తిత్వంతో వేలాదిమంది పేద గుండెల్లో గూడు కట్టుకుంటున్నాడు. తను సంపాదించిన మొత్తంలో సమాజానికి ఉపయోగపడే అనేక కార్యక్రమాలను చేపడుతున్నాడు. ‘మానవ సేవే మాధవ సేవ’ అని నమ్మిన లారెన్స్ వందలాది మంది చిన్నారుల జీవితాల్లో వెలుగులు నింపుతున్నాడు. ఒకటికాదు రెండు కాదు ఏకంగా 131 మంది చిన్నారులకు గుండె ఆపరేషన్స్‌ని తన ట్రస్ట్ ద్వారా జరిపించి వారికి ప్రాణం పోశాడు. చిన్నారుల జీవితాల్లో వెలుగులు నింపి ప్రత్యక్షదేవుడయ్యాడు.

ఎంత ఎత్తుకి ఎదిగినా ఒదిగి ఉండే రాఘవ లారెన్స్ తన కెరియర్ స్టార్టింగ్‌లో చాలా ఒడుదుడుకులను ఎదుర్కొన్నాడు. హీరోల ప్రక్కన డాన్స్ చేస్తూనే కొరియోగ్రాఫర్‌గా అందివచ్చిన అవకాశాన్ని ఉపయోగించుకుని అగ్ర హీరోలు తన కొరియోగ్రఫీ కోసం వేచిచూసే స్ధాయికి చేరుకున్నాడు . మంచి కొరియోగ్రాఫర్‌గానే కాకుండా దర్శకుడిగా సినిమాలను తీసి తనేంటో నిరూపించుకుని తనకంటూ ప్రత్యేక ఇమేజ్‌ని సొంతం చేసుకున్నాడు లారెన్స్. అయితే ఎంత ఎత్తుకు వెళ్లినా తన స్థాయిని మరిచిపోలేదు.

నిరుపేదలకు సహాయం చేయాలనే సంకల్పంతో ‘కలాం’ ట్రస్ట్ ద్వారా వేలాదిమందికి తన సంపాదనలో ఎక్కువ మొత్తాన్ని ఇచ్చి అనేక మందికి మేలు చేస్తున్నాడు. అనాధలు, అంగవైకల్యం, గుండెజబ్బులతో బాధపడే అనేక మంది చిన్నారులకు ఆసరాగా నిలుస్తూ వారి జీవితాల్లో వెలుగులు నింపుతున్నాడు. గత సంవత్సరం 120 మంది చిన్నారులకు గుండె ఆపరేషన్స్‌కి అయ్యే ఖర్చులను భరించింది లారెన్స్ ట్రస్ట్ . తాజాగా ‘ప్రతీక’అనే రెండేళ్ల చిన్నారికి ఓపెన్‌హార్ట్ సర్జరీని విజయవంతంగా చేయడంతో ఇప్పటివరకూ లారెన్స్ 131 మంది చిన్నాలకు గుండె ఆపరేషన్స్ చేయించి ‘మనసున్న మా మారాజు లారెన్స్’ అనిపించుకున్నాడు.