వెంకీ, సునీల్‌తో దర్శకేంద్రుడు భక్తిరస చిత్రాలు!

తెలుగులో వందకు పైగా సినిమాలు. ఎన్నో బ్లాక్ బస్టర్లు. మరెన్నో సూపర్ హిట్‌లు. కామెడీ, సెంటిమెంట్, డ్రామా, సోషియో ఫాంటసీ ఇలా అన్ని హంగులతో కమర్షియల్ సినిమాలకు కేరాఫ్ అడ్రస్‌గా నిలిచారు. ఆయనే దర్శకేంద్రుడు కె.రాఘవేంద్రరావు. హీరోయిన్లను అందంగా చూపించడంలో ఆయనకు ఆయనే సాటి. ఒకప్పుడు కమర్షియల్ సినిమాలు మాత్రమే చేసిన రాఘవేంద్రరావు.. కెరీర్ చరమాంకంలో మాత్రం భక్తిరస, ఆధ్యాత్మిక చిత్రాలే ఎక్కువగా తీశారు. ‘శ్రీరామదాసు’, ‘పాండురంగడు’, ‘శిరిడిసాయి’, ‘ఓం నమో వెంకటేశాయ’ వంటి భక్తి రస చిత్రాలను దర్శకేంద్రుడు తెలుగు ప్రజలకు అందించారు.

అయితే కిందటేడాది వచ్చిన ‘ఓం నమో వెంటేశాయ’ ఆశించిన స్థాయిలో ఆడలేదు. దీంతో ఇప్పుడు మరో రెండు భక్తిరస చిత్రాలు చేయడానికి రాఘవేంద్రరావు సిద్ధమవుతున్నారు. భారీ బడ్జెట్‌తో విక్టరీ వెంకటేష్, హాస్యనటుడు నుంచి హీరోగా మారిన సునీల్‌తో సినిమాలు చేయనున్నట్లు రాఘవేంద్రరావు ప్రకటించారు. శనివారం ఓ ప్రైవేట్ కార్యక్రమంలో పాల్గొనేందుకు ఏలూరు వెళ్లిన రాఘవేంద్రరావు అక్కడ స్థానిక మీడియాతో మాట్లాడారు. వెంకటేష్, సునీల్‌‌తో భక్తిరస సినిమాలు చేస్తున్నట్లు ప్రకటించారు. మే నెల తరవాత ఈ సినిమాలను ప్రారంభిస్తానన్నారు. దీనికి సంబంధించిన వివరాలను త్వరలోనే వెల్లడిస్తానని చెప్పారు. ఇప్పటికే ఈ రెండు ప్రాజెక్టులకు సంబంధించిన స్క్రిప్ట్ పనులు కూడా నడుస్తున్నాయని వెల్లడించారు.

వాస్తవానికి వైవిధ్యభరితమైన సినిమాలు చేసే వెంకటేష్ ఇప్పటి వరకు భక్తిరస చిత్రం ఒక్కటీ చేయలేదు. మరి అలాంటి వెంకటేష్‌తో రాఘవేంద్ర ఎలాంటి భక్తిరస సినిమా ప్లాన్ చేస్తున్నారనే ఆసక్తి అప్పుడే పెరిగిపోయింది. మరోవైపు సునీల్.. హీరో నుంచి కమెడియన్‌గా మారుతున్నారు. ఇలాంటి పరిస్థితుల్లో సునీల్‌తో భక్తిరస చిత్రం అటు ఆయనకి, దర్శకేంద్రుడికి క్లిస్టమనే చెప్పాలి. ఈ సినిమాలకు సంబంధించిన పూర్తి వివరాలు తెలియాలంటే మరికొద్ది రోజులు ఆగాల్సిందే.