ఎన్టీఆర్ బయోపిక్‌కు రాఘవేంద్రుడు.. నో

సీనియర్ ఎన్టీఆర్ జీవిత చరిత్రను సినిమాగా చేయాలని బాలకృష్ణ నిర్ణయించుకున్న సంగతి తెలిసిందే. ఇప్పటికే సినిమా స్క్రిప్ట్ కూడా పూర్తయిందని తెలుస్తోంది. ఈ కథ కోసం దర్శకుడిని వెతికే పనిలో పడ్డాడు బాలయ్య. దానికోసం రాఘవేంద్రరావుని సంప్రదించినట్లు సమాచారం. కానీ ఆ ఆయన ఈ ఆఫర్ ను తిరస్కరించినట్లు తెలుస్తోంది.

నిజానికి ఎన్టీఆర్‌ను డైరెక్ట్ చేసి ఇప్పటికీ సినిమాలను డైరెక్ట్ చేస్తున్న వ్యక్తి రాఘవేంద్రరావు. సెట్స్‌లో ఎన్టీఆర్ ఎలా ఉంటారు? పాత్రలోకి ప్రవేశించిన తరువాత ఆయన ప్రవర్తన ఎలా ఉంటుందనే విషయాలు రాఘవేంద్రరావు గారికి అవగాహన ఉంటుంది.

దాసరి నారాయణరావు కూడా ఆ లిస్ట్‌లో ఉన్నప్పటికీ ప్రస్తుతం ఆయన సినిమాలను డైరెక్ట్ చేసే స్థితిలో లేరు. అందుకే దర్శకేంద్రుడిని సంప్రదించారు. దానికి ఆయన ఈ సినిమా చేయడం అంత సులువు కాదనీ.. కత్తి మీద సాము లాంటిదని చెప్పి తప్పించుకున్నట్లు తెలుస్తోంది. దీంతో పాటు ఇటీవల కాలంలో దర్శకేంద్రుడు డైరెక్ట్ చేసిన ఓం నమోవెంకటేశ, ఝమ్మందినాధం, శిరిడిసాయి చిత్రాలు నిరాశ పరచడంతో రాఘవేంద్రరావు ఇక సినిమాలకు గుడ్ బాయ్ చెప్పే ఆలోచనలో ఉన్నారనే వార్తలు సైతం జోరుగా వినిపిస్తున్నాయి.

ఇలాంటి పరిస్థితుల్లో బాలయ్య ఎన్టీఆర్ బయోపిక్ మూవీకి అనుభవజ్ఞులైన దర్శకులకు ప్రాధాన్యం ఇస్తారో లేక కొత్త వారికి అవకాశం ఇస్తారో చూడాలి.