Soundarya Rajinikanth: వైభవంగా రజినీకాంత్ కుమార్తె రిసెప్షన్

తమిళ సూపర్ స్టార్ రజినీకాంత్ ఇంట పెళ్లి సంబరాలు ప్రారంభమైపోయాయి. బంధుమిత్రులు, అతిథుల తో రజినీ నివాసం కళకళలాడుతోంది. తన కుమార్తె సౌందర్య రజినీకాంత్, వ్యాపారవేత్త విషగన్ వనంగమూడిల ప్రీ-వెడ్డింగ్ రిసెప్షన్‌ శుక్రవారం వైభవంగా జరిగింది. చెన్నైలోని రాఘవేంద్ర కళ్యాణ మండపంలో ఈ రిసెప్షన్‌ను నిర్వహించారు. ఈ రిసెప్షన్‌కు కేవలం కుటుంబ సభ్యులు, బంధుమిత్రులు మాత్రమే హాజరయ్యారు. ఈ వేడుకకు సంబంధించిన ఫొటోలు ప్రస్తుతం సోషల్ మీడియాలో వైరల్‌గా మారాయి.
వధువు సౌందర్య నీలం, బంగారు వర్ణం పట్టుచీరలో మెరిసిపోతుండగా.. వరుడు విషగన్ క్రీమ్ కలర్ పట్టు బట్టల్లో హుందాగా కనిపిస్తున్నారు. ట్విట్టర్‌లో షేర్ చేస్తోన్న ఫొటోల్లో వధూవరులతో పాటు సౌందర్య తండ్రి రజినీకాంత్, తల్లి లత, సోదరి ఐశ్వర్య కనిపిస్తున్నారు. రజినీకాంత్, లత వధూవరుల పక్కన నిలబడి వేదికపైకి వచ్చే అతిథులను ఆప్యాయంగా పలకరిస్తున్నారు.
కాగా.. సౌందర్య, విషగన్ వివాహం ఫిబ్రవరి 11న చెన్నైలో జరగనుంది. సౌందర్య, విషగన్ నిశ్చితార్థం కిందటేడాది జరిగింది. కేవలం కుటుంబ సభ్యులు, సన్నిహితుల మధ్య ఈ నిశ్చితార్థ వేడుకను నిర్వహించారు. విషగన్ వనంగమూడి అపెక్స్ లాబొరేటరీస్ ప్రైవేట్ లిమిటెడ్ యజమాని. అలాగే నటుడు కూడా. సౌందర్య రజినీకాంత్ మాదిరిగానే విషగన్‌కు కూడా ఇది రెండో పెళ్లి. మ్యాగజైన్ ఎడిటర్ కనిఖ కుమారన్‌ను మొదట విషగన్ పెళ్లిచేసుకున్నారు. కొన్నికారణాల వల్ల వీరిద్దరూ విడిపోయారు. ఇక సౌందర్య విషయానికి వస్తే.. వ్యాపారవేత్త అశ్విన్‌ను రజినీ గారాలపట్టి మొదట పెళ్లాడారు. మనస్పర్థలతో వీరిద్దరూ 2017లో విడిపోయారు. వీరిద్దరికీ మూడేళ్ల కొడుకు వేద్ క్రిష్ణ ఉన్నాడు.