సూపర్‌ స్టార్‌కు అరుదైన గౌరవం.. `ఐకాన్ ఆఫ్ గోల్డెన్ జూబ్లీ` అవార్డ్‌

సౌత్ సూపర్‌ స్టార్ రజనీకాంత్‌కు మరో అరుదైన గౌరవం దక్కింది. ఈ ఏడాది జరగనున్న ఇంటర్‌నేషనల్‌ ఫిలిం ఫెస్టివల్‌ ఆఫ్‌ ఇండియా కార్యక్రమంలో రజనీని ఐకాన్‌ ఆఫ్‌ గోల్డెన్‌ జూబ్లీ అవార్డ్‌లో సత్కరించనుంది భారత ప్రభుత్వం. ఈ విషయాన్ని కేంద్ర సమాచార ప్రసార శాఖ మంత్రి ప్రకాష్‌ జవదేకర్‌ ట్విటర్‌ ద్వారా వెల్లడించారు.

`గత కొన్ని దశాబ్దాలుగా ఆయన భారతీయ చలన చిత్ర పరిశ్రమకు అందిస్తున్ సేవలకు గాను ఇంటర్‌ నేషనల్‌ ఫిలిం ఫెస్టివల్‌ ఆఫ్‌ ఇండియా 2019 కార్యక్రమంలో ఆయనకు ఐకాన్‌ ఆఫ్‌ గోల్డెన్‌ జూబ్లీ ఆఫ్‌ ఐఎఫ్‌ఎఫ్‌ఐ 2019 అవార్డు ఇస్తున్నట్టుగా ప్రకటించటం ఆనందంగా ఉంది` అంటూ ట్వీట్ చేశారు.
Also Read: నన్ను ఇన్వాల్వ్‌ చేయకండి `రాజు`గారు.. వర్మకు రాజమౌళి ట్వీట్‌

ఇంతటి ప్రతిష్టాత్మక అవార్డును తనకు అందించనున్నట్టుగా వచ్చిన ప్రకటనపై రజనీకాంత్ స్పందించారు. ఈ సందర్భంగా ఆయన భారత ప్రభుత్వానికి కృతజ్ఞతలు తెలియజేశారు. ఈ వేడుక ఈ నెల 20 నుంచి 28 వరకు గోవాలో నిర్వహించనున్నారు. ఐఎఫ్‌ఎఫ్‌ఐ 2019 వేడుక 50వది కావటంతో భారీగా నిర్వహించేందుకు ప్రభుత్వం ఏర్పాట్లు చేస్తోంది.

ఇదే వేదిక మీద ఫ్రెంచ్‌ నటి ఇసాబెల్లె హుప్పెర్ట్‌కు ఫారిన్‌ ఆర్టిస్ట్‌ విభాగంలో లైఫ్ టైం అచీవ్‌మెంట్ అవార్డ్‌ను అందిస్తున్నారు. గోవాలో జరగనున్న ఈ వేడుకలో 50 మంది మహిళ దర్శకులు తెరకెక్కించిన 50 చిత్రాలను ప్రదర్శిస్తున్నట్టుగా జవదేకర్‌ ప్రకటించారు. ఈ వేడుకల్లో ప్రదర్శిస్తున్న 200 చిత్రాల్లో దాదాపు 24 చిత్రాలు ఆస్కార్‌ నామినేషన్ సాధించినవి కావటం విశేషం.
Also Read: ఆ పని చేస్తే జ్ఞానం రాదు.. వర్మకు జొన్నవిత్తుల కౌంటర్‌

ఇక రజనీ సినిమాల విషయానికి వస్తే ప్రస్తుతం ఆయన మురుగదాస్‌ దర్శకత్వంలో తెరకెక్కుతున్న దర్బార్‌చిత్ర షూటింగ్‌లో బిజీగా ఉన్నాడు. ఈ సినిమా షూటింగ్ దాదాపుగా పూర్తి కావచ్చింది. రజనీ పోలీస్‌ ఆఫీసర్‌గా నటిస్తున్న ఈ సినిమాలో నయనతార హీరోయిన్‌గా నటిస్తోంది. నివేదా తామస్‌, బాలీవుడ్‌ నటుడు సునీల్‌ శెట్టి, యోగి బాబులు ఇతర కీలక పాత్రల్లో నటిస్తున్నారు.

ఈ సినిమా తరువాత రజనీ మాస్‌ యాక్షన్‌ చిత్రాల దర్శకుడు శివ దర్శకత్వంలో ఓ సినిమా చేసేందుకు రెడీ అవుతున్నాడు. ఇప్పటికే ఈ సినిమాకు సంబంధించిన అధికారిక ప్రకటన కూడా వెలువడింది. సినిమాల్లో బిజీగా కొనసాగుతూనే రాజకీయాల్లోనూ తన ప్రభావం చూపించేందుకు రెడీ అవుతున్నాడు సూపర్‌ స్టార్‌.
Also Read: మార్పుకు స్వాగతం.. `ఖైదీ` సూపర్‌ అన్న మహేష్