రూ.81 కోట్లకి అమ్ముడైన 2.0 తెలుగు రైట్స్

తమిళ సూపర్ స్టార్ రజినీకాంత్, బాలీవుడ్ స్టార్ హీరో అక్షయ్ కుమార్ ప్రధాన పాత్రల్లో తెరకెక్కిన 2.0 మూవీ తెలుగు రైట్స్‌ భారీ ధరకి అమ్ముడయ్యాయనేది ఇప్పుడు కొత్త వార్తేం కాదు. కాకపోతే ఆ సినిమా తెలుగు హక్కులని దక్కించుకున్న ఏషియన్ ఫిలింస్ అనే డిస్ట్రిబ్యూషన్ కంపెనీ అందుకోసం ఎంత భారీ మొత్తం వెచ్చించింది అనే వివరాలు మాత్రం అప్పట్లో బయటికి వెల్లడవలేదు. లేటెస్ట్ ఫిలింనగర్ అప్‌డేట్స్ ప్రకారం తమిళంలో ఈ సినిమాను నిర్మిస్తున్న లైకా ప్రొడక్షన్స్ నుంచి ఏషియన్ ఫిలింస్ రూ.81 కోట్లు వెచ్చించి మరీ తెలంగాణ, ఏపీలకి సంబంధించిన తెలుగు హక్కులని కొనుగోలు చేసినట్టు తెలుస్తోంది. ఇప్పటివరకు వున్న గణాంకాల ప్రకారం ఇతర భాషా చిత్రానికి సంబంధించిన తెలుగు హక్కులకి ఇంత భారీ మొత్తం పలకడం ఇదే తొలిసారి.

వచ్చే ఏడాదిలో రిలీజ్ కానున్న ఈ సినిమా కోసం లైకా ప్రొడక్షన్స్ సైతం భారీగానే బడ్జెట్ ఖర్చుచేసింది. 2.0 సినిమాకి సైన్ చేసిన అక్షయ్ కుమార్ తొలిసారిగా ఓ సౌతిండియన్ మెయిన్ సినిమాలో నటిస్తున్నాడు. శంకర్ డైరెక్ట్ చేస్తున్న ఈ సినిమాలో రజినీకాంత్ సరసన అమీ జాక్సన్ హీరోయిన్‌గా నటించింది. ఇటీవలే రిలీజైన 2.0 మూవీ మేకింగ్ వీడియో ఇంటర్నెట్‌లో వైరల్ అయిన సంగతి తెలిసిందే.