ఆ ఇద్దరిలో మాస్ మహారాజా ఓటు ఎవరికో..?

మాస్ మహారాజా రవితేజ ప్రస్తుతం ‘టచ్ చేసి చూడు’ సినిమాలో నటిస్తున్నాడు. ఈ సినిమా వచ్చే ఏడాదిలో ప్రేక్షకుల ముందుకు రానుంది. ఈ సినిమా తరువాత రవితేజ.. కల్యాణ్ కృష్ణ దర్శకత్వంలో ఓ సినిమా చేయడానికి రెడీ అవుతున్న సంగతి తెలిసిందే. ఈ నెలలో సినిమా ప్రారంభం కానుంది. తన సినిమాల్లో యంగ్ హీరోయిన్స్‌ను తీసుకోవడం రవితేజకు అలవాటు. అలా కొత్త కాంబినేషన్స్‌ను రిపీట్ చేస్తూ ఫ్రెష్ ఫీలింగ్ కలిగిస్తుంటాడు. ఈసారి కూడా తెరపై ఇద్దరు ముద్దుగుమ్మల పేర్లు తీసుకొచ్చాడు. వారే రకుల్ ప్రీత్ సింగ్, లావణ్య త్రిపాఠి.

ఈ ఇద్దరిలో ఎవరో ఒకరిని కల్యాణ్ కృష్ణ సినిమాలో హీరోయిన్‌గా తీసుకోవాలని ప్లాన్ చేస్తున్నాడు. గతంలో రవితేజ.. రకుల్‌తో కలిసి ‘కిక్2’ సినిమాలో నటించాడు. లావణ్యతో మాత్రం ఇప్పటివరకు కలిసి సినిమా చేసింది లేదు. దీంతో తెరపై వీరిద్దరి జంట కొత్తగా ఉంటుందని ఆలోచిస్తున్నాడు. మరోపక్క దర్శకుడు కల్యాణ్ కృష్ణ ఈ ఇద్దరి హీరోయిన్లతో ఇదివరకే పని చేసిన అనుభవం ఉంది. కాబట్టి హీరో ఎవరిని తీసుకోమని చెబుతారో వారినే తీసుకుందామని నిర్ణయించుకున్నాడట. మరి రవితేజ ఓటు ఎవరికో చూడాలి!