1993 నుంచి.. మూడేళ్లకే మొదలుపెట్టిన రకుల్ ప్రీత్ సింగ్!

అందంతో పాటు ఫిట్‌నెస్‌కు అధిక ప్రాధాన్యత ఇచ్చే హీరోయిన్లలో రకుల్ ప్రీత్ సింగ్ ఒకరు. ఆమె ఎంత అందంగా ఉంటారో అంతే ఫిట్‌గా కనిపిస్తారు. రకుల్ ఫిట్‌నెస్‌కు ఎంత ప్రాధాన్యత ఇస్తారో ఆమె ఇన్‌స్టాగ్రామ్ ఫాలోవర్లకు బాగా తెలుసు. రకరకాల వ్యాయామాలు చేస్తూ, యోగాసనాలు వేస్తూ వాటిని ఫొటోలు, వీడియోల రూపంలో ఇన్‌స్టాగ్రామ్‌లో రకుల్ పోస్ట్ చేస్తూ ఉంటారు. వాస్తవానికి ప్రస్తుత ఆధునిక యుగంలో హీరోయిన్లుగా సుధీర్ఘంగా కొనసాగాలి అంటే ఫిట్‌గా ఉండటం తప్పనిసరి. అందుకే, చాలా మంది హీరోయిన్లు ఫిజిక్‌ను కాపాడుకోవడం కోసం జిమ్‌లలో తెగ కష్టపడుతుంటారు.

Also Read: నయనతారకు తప్ప మరొకరికి ఛాన్స్ లేదు: క్లారిటీ ఇచ్చిన దర్శకుడు

అయితే, రకుల్‌ మాత్రం చిన్నప్పటి నుంచీ యోగా, వ్యాయామాలు చేస్తున్నారు. మూడేళ్లకే యోగా మొదలుపెట్టారు. ఈ విషయాన్ని ఆమెనే స్వయంగా వెల్లడించారు. చిన్న తనంలో తాను యోగా చేస్తోన్న ఫొటోను రకుల్ తన ఇన్‌స్టాగ్రామ్ స్టోరీలో పెట్టుకున్నారు. దీనికి ‘1993 నుంచి యోగా’ అని క్యాప్షన్ పెట్టారు. అంటే, అప్పటికి రకుల్ వయసు మూడేళ్లు. రకుల్ 1990 అక్టోబర్ 10న జన్మించారు.
కాగా, టాలీవుడ్‌లో స్టార్ హీరోయిన్‌గా ఎదిగిన రకుల్.. ప్రస్తుతం బాలీవుడ్‌‌పై కన్నేశారు. అక్కడ హీరోయిన్‌గా ఎదిగే ప్రయత్నాలు చేస్తున్నారు. అందుకే, తన మకాంను పూర్తిగా ముంబైకి మార్చేశారు. ‘దే దే ప్యార్ దే’ సినిమాలో అజయ్ దేవగణ్ పక్కన ఛాన్స్ కొట్టేసిన రకుల్.. ఆ తరవాత ‘మార్ జవాన్’, ‘సిమ్లా మిర్చి’ సినిమాల్లో నటించారు. లాక్‌డౌన్ సమయంలోనూ ఇంట్లోనే వ్యాయామాలు చేస్తూ మనకున్న సదుపాయాలతో ఫిట్‌నెస్ ఎలా కాపాడుకోవచ్చో తన ఫాలోవర్లకు చూపించారు.