లుక్‌ కిక్: 'రంగస్థలం' జాతరలో రామ్ చరణ్

మెగా పవర్‌స్టార్ రామ్ చరణ్ హీరోగా సుకుమార్ దర్శకత్వంలో 'రంగస్థలం 1985' సినిమా రూపొందుతోన్న సంగతి తెలిసిందే. ప్రస్తుతం ఈ సినిమా చిత్రీకరణ చివరి దశలో ఉంది. ఇటీవల రామ్ చరణ్ ఈ సినిమా సెట్ ఫోటోలు విడుదల చేసి అందరిలో ఆసక్తిని క్రియేట్ చేశారు. ఇప్పుడు చిత్రనిర్మాతలు మైత్రి మూవీ మేకర్స్ వారు సినిమా సెట్‌కు సంబంధించిన ఒక ఫోటోను అభిమానులతో పంచుకున్నారు.

'రంగస్థలం జాతర' అంటూ పోస్ట్ చేసిన ఈ ఫోటోలో రామ్ చరణ్ వెనక నుండి రంగు రంగుల బొమ్మల చొక్కా వేసుకొని పల్లెటూరు కుర్రోడిలా కనిపిస్తున్నాడు. ఆ సెట్‌లో రంగులరాట్నం, బొమ్మలు ఇలా వాతావరణం మొత్తం కూడా చాలా కలర్ ఫుల్‌గా కనిపిస్తోంది. ఈ పోస్టర్ సినిమాపై అమితాసక్తిని కలిగిస్తోంది. నిజానికి మొదట సంక్రాంతి కానుకగా ఈ సినిమాను విడుదల చేయాలని దర్శకనిర్మాతలు భావించారు. కానీ కొన్ని కారణాల వలన ఇప్పుడు సినిమా రిలీజ్‌ను మార్చికి వాయిదా వేశారు. ఈ సినిమాలో రామ్ చరణ్ సరసన సమంత హీరోయిన్‌గా కనిపించనుంది. అలానే మరో ముఖ్య పాత్రలో అనసూయ కూడా నటిస్తుండగా.. దేవిశ్రీప్రసాద్ సంగీతం అందిస్తున్నారు. ఈ సినిమాను పల్లెటూరి నేపధ్యంలో సాగే ప్రేమకథగా తెరకెక్కిస్తున్నాడు సుకుమార్.

#Rangasthalam Jaatara 😍 pic.twitter.com/WENea5wedL — Mythri Movie Makers (@MythriOfficial) November 6, 2017