షూటింగ్‌కు బ్రేక్.. బాబాయ్‌కి రామ్ చరణ్ సపోర్ట్!

ప్రస్తుతం ఆంధ్రప్రదేశ్‌లో ఎన్నికల హీట్ నడుస్తోంది. అధికార తెలుగు దేశం పార్టీ, ప్రతిపక్ష వైఎస్సార్ కాంగ్రెస్ పార్టీ ఒకరి మీద ఒకరు కారాలు, మిరియాలు నూరుతున్నారు. వాళ్లకంటే నేనేం తక్కువ కాదంటూ న్యూ కామర్ జనసేన పార్టీ ప్రచారంలో దూసుకుపోతోంది. లెఫ్ట్, దళిత పార్టీలతో చేతులు కలిపి ఎన్నికల బరిలో గట్టి పోటీని ఇవ్వడానికి అన్ని ప్రయత్నాలు చేస్తోంది. ఇప్పటికే జనసేనాని పవన్ కళ్యాణ్ రాష్ట్ర వ్యాప్తంగా విస్తృతంగా ప్రచారం చేస్తున్నారు.

ఇలాంటి కీలక సమయంలో పవన్ కళ్యాణ్‌తో పాటు రామ్ చరణ్ కూడా ఎన్నికల ప్రచారంలో పాల్గొంటే బాగుండేదని చాలా మంది మెగా అభిమానులు అభిప్రాయపడ్డారు. కానీ, ఏంచేస్తాం.. ఆయన RRR షూటింగ్‌లో ఫుల్ బిజీ. అందుకే ఇక మెగా అభిమానులు ఆశలు వదులుకున్నారు. పవన్ కళ్యాణ్ ఇమేజ్, స్టామినాతోనే ప్రజల్లోకి వెళ్లాలని డిసైడ్ అయిపోయారు. అయితే, అనూహ్యంగా ఇప్పుడు వాళ్లకి రామ్ చరణ్ సపోర్ట్ దొరికింది. నేరుగా ఎన్నికల ప్రచారంలో పాల్గొనకపోయినా సోషల్ మీడియా ద్వారా జనసేన శ్రేణులను మెగా పవర్ స్టార్ ఉత్తేజపరుస్తున్నారు.

ఇటీవల RRR షూటింగ్‌లో పాల్గొనడానికి గుజరాత్‌లోని వడోదర వెళ్లిన రామ్ చరణ్.. మంగళవారం జిమ్‌లో వర్కౌట్ చేస్తూ గాయపడిన విషయం తెలిసిందే. కాలి చీలమండకు గాయం కావడంతో రామ్ చరణ్‌ను డాక్టర్లు విశ్రాంతి తీసుకోమని సూచించారు. దీంతో మూడు వారాల విరామం తరవాత మళ్లీ షూటింగ్ ప్రారంభం కానుంది. ఈ విషయాన్ని స్వయంగా రామ్ చరణ్ తన ఫేస్‌బుక్ ఖాతా ద్వారా అభిమానులకు వెల్లడించారు. అయితే ఈ పోస్ట్ పెట్టిన కొన్ని గంటల తరవాత జనసేనను సపోర్ట్ చేస్తూ రామ్ చరణ్ మరో పోస్ట్ పెట్టారు.

జనసేన మ్యానిఫెస్టోను పొగుడుతూ రామ్ చరణ్ ఫేస్‌బుక్ పోస్ట్ చేశారు. ‘సమాజంలోని అన్ని వర్గాలకు ప్రాధాన్యతను ఇస్తూ అద్భుతమైన మ్యానిఫెస్టోను రూపొందించారు. రాజకీయాల్లో ఇదో కొత్త కెరటం. కళ్యాణ్ బాబాయ్‌కి అభినందనలు. జనసేన పార్టీ అభ్యర్థులందరికీ శుభాకాంక్షలు. గ్లాస్ గుర్తుకు ఓటేయండి’ అని తన పోస్ట్‌లో రామ్ చరణ్ పేర్కొన్నారు. మొత్తానికి RRR షూటింగ్ నుంచి కాస్త విరామం తీసుకున్న చరణ్.. ఈ తక్కువ సమయంలో బాబాయ్‌కి సపోర్ట్‌గా నిలుస్తున్నారు.