బాబాయ్ పిలిస్తే ప్రచారానికి నేను సిద్ధం: రామ్ చరణ్

వచ్చే ఎన్నికల్లో జనసేన పార్టీ విజయమే ధ్యేయంగా అలుపెరగని పోరాట యాత్ర చేస్తున్న పవన్ కళ్యాణ్‌కు మెగా పవర్‌స్టార్ రామ్ చరణ్ తేజ్ బాసటగా నిలిచారు. కళ్యాణ్ బాబాయ్ పిలిస్తే జనసేన తరఫున ప్రచారానికి తాను సిద్ధంగా ఉన్నానని స్పష్టం చేశారు. రిటైల్ మొబైల్ స్టోర్స్ సంస్థ ‘హ్యాపీ మొబైల్స్’కు రామ్ చరణ్ బ్రాండ్ అంబాసిడర్‌గా నియమితులయ్యారు. ఈ సందర్భంగా ఆ సంస్థ గురువారం ప్రెస్ మీట్ నిర్వహించింది. ఈ సందర్భంగా ఓ అమ్మాయి ‘సినిమా స్టార్లు పొలిటికల్ క్యాంపెయిన్‌లో పాల్గొంటున్నారు. మీ క్యాపెయిన్ ఎలా ఉండబోతోంది?’ అని అడిగింది. దీనికి సమాధానం ఇస్తూ..

‘ప్రజారాజ్యం పార్టీ పెట్టినప్పుడు ప్రచారం చేద్దామనుకున్నా. కానీ నీకింకా సమయముంది అప్పటి వరకు వెయిట్ చెయ్ అని కళ్యాణ్ బాబాయ్ చెప్పాడు. మా అవసరం ఆయనకున్నప్పుడు మేమంతా ఆయనకు భరోసాగా నిలుస్తాం. ఆయన పిలుపిచ్చినప్పుడు ఒక సెకెన్ కూడా ఆలోచించకుండా నేను వెళ్లి క్యాంపెయిన్ చేస్తాను. అయితే నేను ప్రచారం చేయొచ్చని ఆయనకి అనిపించాలి. ఆయన సూచనలు మేం ఎప్పుడూ పాటిస్తాం’ అని రామ్ చరణ్ చెప్పారు.
బాబాయ్‌కు భరోసాగా ఉంటానని అబ్బాయ్ చెప్పేయడంతో ఇప్పుడు ఇదే హాట్ టాపిక్‌గా మారింది. సోషల్ మీడియాలో తెగ వైరల్ అయిపోయింది. రామ్ చరణ్, పవన్ కళ్యాణ్ అభిమానులు ఈ వీడియోను సోషల్ మీడియాలో తెగ షేర్లు చేస్తున్నారు.