‘కొదమ సింహం’ను గుర్తుచేసిన చరణ్.. ఫొటోలు వైరల్

మెగా పవర్ స్టార్ రామ్ చరణ్ ప్రస్తుతం తన భార్య ఉపాసనతో ఆఫ్రికాలో హాలిడేను ఎంజాయ్ చేస్తోన్న సంగతి తెలిసిందే. జూన్ 14న తమ ఏడో వివాహ వార్షికోత్సవాన్ని పురష్కరించుకుని ముందుగానే ఈ మెగా జంట విహార యాత్రకు వెళ్లింది. జూన్ 14 నాటికి చరణ్ ‘RRR’ షూటింగ్‌లో పాల్గొనాల్సి ఉన్నందున ముందుగానే వివాహ వార్షికోత్సవాన్ని వీరు జరుపుకుంటున్నారు.

దీనిలో భాగంగా వీరిద్దరూ టాంజానియాలో నాలుగు రోజుల పాటు పర్యటించారు. అక్కడి సెరెంగెటి నేషనల్ పార్క్‌లో ప్రకృతిని ఆస్వాదించారు. వన్య ప్రాణులతో సరదాగా గడిపారు. సఫారీని ఎంజాయ్ చేశారు. ఈ నేషనల్ పార్క్‌లోని సెరొనెరాలో ఉన్న వన్ నేచర్ హోటల్‌లో వీరు బస చేశారు.

సెరొనెరాలో తమకు ఆతిథ్యమిచ్చిన వారందరికీ కృతజ్ఞతలు తెలుపుతూ ఉపాసన తాజాగా ట్వీట్ చేశారు. ఈ ట్వీట్‌లో మూడు ఫొటోలను కూడా పొందుపరిచారు. ఈ ఫొటోల్లో చరణ్ రౌండ్ హ్యాట్ పెట్టుకుని చాలా స్టైల్‌గా కవ్ బాయ్‌లా ఉన్నారు. ‘కొదమ సింహం’ సినిమాలో తన తండ్రి చిరంజీవిని గుర్తు చేశారు. చరణ్ లుక్ అచ్చం చిరంజీవిని తలపిస్తోంది. దీంతో ప్రస్తుతం ఈ ఫొటోలు సోషల్ మీడియాలో వైరల్‌గా మారాయి.
సెరొనెరాలో ఆతిథ్యమిచ్చిన వారందరికీ కృతజ్ఞతలు తెలిపారంటే ఇక అక్కడి నుంచి చరణ్, ఉపాసన బయలుదేరినట్టే. నెక్ట్స్ ఎక్కడికి వెళ్తున్నారో తెలియాల్సి ఉంది. ఈ విహార యాత్రను ముగించుకుని త్వరలోనే వీరిద్దరూ హైదరాబాద్‌కు తిరిగి వస్తారు. వచ్చిన వెంటనే చరణ్ ‘RRR’ షూటింగ్‌లో పాల్గొ్ంటారు.