విక్రమ్ 'ఇరు ముగన్' కి రామ్ చరణ్ తేజ్ గెస్ట్ !

బాలీవుడ్ నుంచి వచ్చిన ప్రతీ సినిమా మంచి కలెక్షన్లు సాధిస్తుంది ఎందుకంటే. నార్త్ ఇండియా మొత్తం వారి సినిమాలు చూస్తారు. సౌత్ ఇండియాలో కూడా హిందీ సినిమాలకు గిరాకీ ఉంటుంది. అదే సౌత్ సినిమాలను మాత్రం నార్త్ వారు పెద్దగా పట్టించుకోరు. టీవీల్లో వస్తే మాత్రం చూస్తారు. నిజానికి ఈ మధ్య బాలీవుడ్ లో నిర్మితమవుతున్న సినిమాలన్నీ సౌత్ ఇండియన్ సినిమాలే. ఇక మన విషయానికి వస్తే ఇటీవల కాలంలో తెలుగు సినిమా సౌత్ ఇండియన్ మార్కెట్ ను దంచేస్తుంది. తెలుగు సినిమాల్లో తమిళ, మళయాల, కన్నడ నటులను నటింపజేయడం. కోలీవుడ్, మల్లువుడ్ లో సూపర్ హిట్ అయిన సినిమాలు తెలుగులో రీమేక్స్ చేయడం ద్వారా సౌత్ ఇండియన్ సినిమా ఇండస్ట్రీలలోని హీరోలు, టెక్నీషియన్ల మధ్య స్నేహపూర్వక వాతావరణం కొనసాగుతుంది. ఒక హీరో సినిమా ఆడియో ఫంక్షన్ కు మరొక హీరో వెళ్ళి అభినందనలు తెలియజేస్తున్నారు. రీసెంట్ గా 'కబాలి' సినిమా ఆడియో ఫంక్షన్ కు మెగా హీరో వరుణ్ తేజ్ హాజరయ్యాడు. ఇదే మాదిరి మెగాపవర్ స్టార్ రామ్ చరణ్ తేజ్ తమిళ హీరో విక్రమ్ సినిమా ఆడియో ఫంక్షన్ కు హాజరు కాబోతున్నాడు. ప్రముఖ నటుడు విక్రమ్ హీరోగా ఆనంద్ శంకర్ దర్శకత్వంలో 'ఇరు ముగన్' అనే తమిళ చిత్రం రూపొందుతున్న విషయం తెలిసిందే. ఈ చిత్రాన్ని తెలుగులో 'ఇంకొక్కడు' పేరుతో డబ్ చేసి విడుదల చేస్తున్నారు.


ఆగస్ట్ 2న చెన్నైలో ఈ సినిమా ఆడియో విడుదల కార్యక్రమం జరగనుంది. అయితే ఈ వేడుకకు ముఖ్య అతిథిగా రావాలని చరణ్ ను ఇరు ముగన్ చిత్రబృందం కోరారు. దీనికి వెంటనే చరణ్ అంగీకరించినట్లుగా తెలుస్తోంది. ధృవ సినిమా షూటింగ్ లో బిజీగా ఉన్న చరణ్ ఆడియో ఫంక్షన్ కు వస్తానని మాటివ్వడం విశేషం. తెలుగు, తమిళ నటుల మధ్య సత్సంబంధాలు ఇలానే కొనసాగాలని, తెలుగు సినిమా స్థాయి మరింత పెరగాలని కోరుకుందాం.