‘అర్జున్ రెడ్డి’కి రామ్ చరణ్ హ్యాట్సాఫ్!

వివాదాల మధ్య విడుదలై అద్భుత విజయం సాధించిన ‘అర్జున్ రెడ్డి’ సినిమాపై ప్రశంసల జల్లు కొనసాగుతోంది. విజయ్ దేవరకొండ నటనకు, సందీప్ రెడ్డి వంగ దర్శకత్వానికి అందరూ ఫిదా అవుతున్నారు. ఇప్పుడు ఈ కోవలోకి మెగా పవర్ స్టార్ రామ్ చరణ్ కూడా చేరిపోయారు. ప్రస్తుతం సుకుమార్ దర్శకత్వంలోని ‘రంగస్థలం-1985’ సినిమా షూటింగ్‌లో బిజీగా ఉన్న రామ్ చరణ్.. ఇటీవల ‘అర్జున్ రెడ్డి’ సినిమాను చూశారు. ఈ సినిమాపై తన అభిప్రాయాన్ని ఫేస్‌బుక్ ద్వారా పంచుకున్నారు.

‘అర్జున్ రెడ్డి చూశాను. రా, రియలిస్టిక్, బ్లడీ బోల్డ్. సందీప్ వంగ, విజయ్ దేవరకొండ, షాలిని పాండే, రాహుల్ రామక్రిష్ణతో పాటు సినిమాకు పనిచేసిన అందరికీ హ్యాట్స్ ఆఫ్’ అని ఆదివారం తన ఫేస్‌బుక్ అకౌంట్‌లో రామ్ చరణ్ పేర్కొన్నారు. ‘అర్జున్ రెడ్డి’కి వ్యతిరేకంగా మీడియాలో ఎన్ని కథనాలు వస్తున్నా ప్రేక్షకుల నుంచి ఆదరణ మాత్రం తగ్గడంలేదు. నిజజీవితానికి చాలా దగ్గరగా సినిమాను తీశారని ప్రశంసలు కురిపిస్తున్నారు. ఇప్పటికే రాజమౌళి, మహేష్ బాబు, సమంత, అనుష్క వంటి సినీ ప్రముఖులు ఈ లిస్టులో చేరిపోయారు. తాజాగా చరణ్ స్పందించారు.

కేవలం రూ. 4 కోట్ల పెట్టుబడితో తీసిన ఈ చిన్న సినిమా భారీ విజయం సాధించింది. అంతేకాకుండా సుమారు రూ. 40 కోట్ల గ్రాస్ వసూలు చేసింది. ఇంకా థియేటర్లలో దూసుకుపోతోంది. ఇటీవల వచ్చిన ఏ సినిమాలు ‘అర్జున్ రెడ్డి’కి పెద్దగా పోటీ ఇవ్వలేకపోవడంతో యువత దీనివైపే ఎక్కువగా మొగ్గు చూపుతున్నారు.