నా బిగ్గెస్ట్ క్రిటిక్ ఉపాసన: చరణ్

మెగాస్టార్ చిరంజీవి తనయుడు రామ్ చరణ్.. ఉపాసనను ప్రేమించి పెళ్లిచేసుకున్న సంగతి తెలిసిందే. మెగాస్టార్ కోడలు, మెగాపవర్ స్టార్ భార్య అయినప్పటికీ ఉపాసన చాలా సింపుల్‌గా ఉంటారు. వార్తల్లో కూడా పెద్దగా కనిపించరు. చరణ్ కూడా తన భార్య గురించి ఎక్కడా ఎప్పుడూ ప్రత్యకేంగా చెప్పింది లేదు. కానీ ఇటీవల ఒక సందర్భంలో ఉపాసన గురించి ఒక విషయాన్ని చెప్పాడు చరణ్. తనకు భార్య ఉపాసనే పెద్ద విమర్శకురాలని చరణ్ అన్నాడు.

'ఓ సినిమా సైన్ చేసే ముందు నేను ఉపాసనను సంప్రదించను. నాకు కథ నచ్చితే ఒప్పుకుంటాను. సినిమాల గురించి ఇంట్లో డిస్కస్ చేసుకోం. కానీ నా సినిమాలకు తనే పెద్ద క్రిటిక్. నేను నటించిన సినిమాలు చూసి తన ఓపినీయన్ నిర్మొహమాటంగా చెప్పేస్తుంది. తను ఇచ్చే సలహాలను నేను తప్పకుండా పాటిస్తాను' అంటూ చరణ్ వెల్లడించారు. ప్రస్తుతం చరణ్, సుకుమార్ ప్రాజెక్ట్‌లో నటించడానికి రెడీ అవుతున్నాడు.

కాగా, ఉపాసన కామినేని, అపోలో హాస్పిటల్స్‌కు సంబంధించిన వ్యవహారాలను చూసుకుంటూ ఉంటారు. ఉపాసనకు తెలుగు పెద్దగా రాదు. కాబట్టి హిందీ సినిమాలు మాత్రమే చూస్తూ ఉంటారు. కానీ భర్త హీరో కావడం, మెగాస్టార్ ఇంటికి కోడలు కావడంతో తెలుగు సినిమాల గురించి కూడా నాలెడ్జ్ సంపాదించడం మొదలుపెట్టారు. ప్రస్తుతం చరణ్ తన సొంత బ్యానర్‌లో నిర్మించిన 'ఖైదీ నంబర్ 150' సినిమా రిలీజ్ కోసం ఎదురుచూస్తున్నాడు.