‘ధృవ’లో నటించింది నేను కాదు.. పిల్లాడితో రామ్ చరణ్ వాదన

మెగా పవర్ స్టార్ రామ్ చరణ్‌కు చిన్న పిల్లల్ని ఆటపట్టించడమన్నా.. వాళ్లతో సరదాగా ముచ్చట్లు పెట్టడమన్నా ఎంతో ఇష్టం. ‘రంగస్థలం’ సినిమా షూటింగ్ సమయంలో కొంత మంది పిల్లలతో సరదాగా గడిపిన వీడియో అప్పట్లో బాగా వైరల్ అయ్యింది. ఇదే కాదు ‘ధృవ’, ‘వినయ విధేయ రామ’ సెట్‌లలో కూడా ఇలానే చిన్నారులతో సరదాగా ఆడుకున్నారు రామ్ చరణ్. ఇప్పుడు మరోసారి ఒక పిల్లాడిని ఆటపట్టించారాయన.

తాను కసరత్తులు చేసే జిమ్‌లో ఒక చిన్న పిల్లాడితో సరదాగా వాదన పెట్టుకున్నారు చరణ్. ‘‘రీసెంట్‌గా నా సినిమా ఏం చూశావ్’’ అని ఆ పిల్లాడిని రామ్ చరణ్ అడిగారు. దీనికి ఆ బాలుడు ‘ధృవ’ అని సమాధానం ఇచ్చాడు. వెంటనే చరణ్.. ఆ సినిమాలో ఉన్నది నేను కాదు, మీ నాన్న అని అన్నారు. కానీ, ఆ పిల్లాడు మాత్రం మీరే అంటూ వాదించాడు. ఇలా వీరిద్దరూ చాలా సేపు వాదించుకున్నారు. మొత్తానికి ఆ బాలుడిని దగ్గరకు తీసుకున్న చరణ్.. అందరినీ జిమ్‌కు వెళ్లమని పిల్లాడితో చెప్పించారు.
ఆ బాలుడు ఎవరో తెలియదు కానీ, వారిద్దరి మధ్య సరదాగా జరిగిన ఈ వాదన చూడముచ్చటగా ఉంది. అందుకే, ఈ వీడియోను చరణ్ ఇన్‌స్టాగ్రామ్ ద్వారా అభిమానులతో పంచుకున్నారు. కాగా, చెర్రీ ప్రస్తుతం RRR షూటింగ్‌లో బిజీగా ఉన్నారు. దర్శకధీరుడు ఎస్.ఎస్.రాజమౌళి తెరకెక్కిస్తోన్న ఈ సినిమాలో యంగ్ టైగర్ ఎన్టీఆర్ మరో హీరో. ఈ సినిమాలో అల్లూరి సీతారామరాజుగా కనిపించనున్న చరణ్‌కు జోడీగా బాలీవుడ్ బ్యూటీ ఆలియా భట్ నటిస్తోంది. ఇక కొమరం భీమ్ పాత్ర పోషిస్తోన్న ఎన్టీఆర్‌కు హీరోయిన్‌గా బ్రిటిష్ నటి ఒలివియా మోరిస్‌ను ఎంపిక చేశారు.