ఎందుకొచ్చిన సిటీ లైఫ్: చిట్టిబాబు స్పీచ్

‘రంగస్థలం’ సినిమా చేసిన తరువాత సిటీ లైఫ్ ఎందుకు అని అనిపించిందన్నారు మెగాపవర్ స్టార్ రామ్ చరణ్ తేజ్. విశాఖపట్నం ఆర్ కె బీజ్‌లో ఆదివారం నాడు జరిగిన ప్రీ రిలీజ్ ఈవెంట్‌లో ‘రంగస్థలం’ షూటింగ్ జరిగిన గోదావరి ప్రాంతాలతో ఉన్న అనుబంధాన్ని గుర్తు చేసుకున్నారు రామ్ చరణ్. ఆయన మాట్లాడుతూ.. నమస్తే వైజాగ్.. మా ఫ్యాన్స్ మధ్యలో ఇలా ఉగాది పండుగను సెలబ్రేట్ చేసుకోవడం చాలా ఆనందంగా ఉందన్నారు. ప్రతి పండుగను కుటుంబ సభ్యుల మధ్యన జరుపుకుంటాం కాని ఈ రోజు రంగస్థలం ప్రి రిలీజ్ వేడుక సందర్భంగా ఇంత మంది కుటుంబ సభ్యులతో ఉగాది పండుగను జరుపుకోవడం ఆనందంగా ఉందన్నారు.

‘రంగస్థలం’ సినిమా అభిమానులు గర్వపడేలా వచ్చిందని ఇందుకు చిత్రం కోసం పనిచేసిన ప్రతి ఒక్కరికీ ధన్యవాదాలను తెలిపారు. ముఖ్యంగా ఈ చిత్ర నిర్మాతలు చాలా వ్యయ ప్రయాసలతో ‘రంగస్థలం’ మూవీని రూపొందించారన్నారు. ఈ సినిమాకు సినిమాటోగ్రాఫర్‌గా పనిచేసిన రత్నవేలు ఒక పల్లెటూరిని ఎంత అందంగా చూపించాలో అంతం అందంగా చూపించారు. ఇంత వరకూ నేను పల్లెటూరుకి వెళ్లింది చాలా తక్కువ సందర్భాల్లో ఒకటి మా తాతగారు నెల్లూరులో పనిచేసినప్పుడు.. రెండు మా నాన్న ఆపద్భాందువుడు షూటింగ్ అప్పుడే వెళ్లా కాని సుకుమార్ వల్ల ఈరోజు మన ఊరుని పరిచయం చేశారు. ఎందుకు సిటీలో ఉంటున్నామా అనిపించింది ఈ సినిమా పూర్తయ్యే సరికి. ఈ సినిమాతో కొత్త చరణ్‌ని పరిచయం చేశారు. మా ఫ్యాన్స్‌తో పాటు మా అమ్మనాన్నలు గర్వపడేలా మంచి క్యారెక్టర్ ఇచ్చిన సుకుమార్ ధన్యవాదాలను తెలుపుకుంటూ తన ప్రసంగాన్ని ముగించారు రామ్ చరణ్.