పవన్ కొడుకు పేరు: వర్మకు కూతురి కౌంటర్

పవన్ కల్యాణ్ భార్య అన్నా లెజెనెవా ఇటీవలే పండంటి మగ బిడ్డకు జన్మనిచ్చిన సంగతి తెలిసిందే. ఆ బాబుకు మార్క్ శంకర్ పవనోవిచ్ అనే పేరు పెట్టారనే వార్త సోషల్ మీడియాలో ప్రచారం అవుతోంది. ఈ విషయంలో రామ్ గోపాల్ వర్మ వెటకారంగా స్పందించారు. మార్క్ శంకర్ పవనోవిచ్ అనేది ఇప్పటి వరకూ నేను విన్న వాటిలో గొప్ప పేరు. భాషలు పుట్టిన తర్వాత, నాగరికతలు మొదలైన తర్వాత తను ఇంత గొప్ప పేరు వినలేదని ఆర్జీవీ ఫేస్‌బుక్ లో పేర్కొన్నాడు.

పవన్‌ కల్యాణ్ అభిమాని అయిన రామ్ గోపాల్ వర్మ కూతురు రేవతికి ఈ విషయంలో తండ్రి వ్యవహార శైలి నచ్చలేదు. చారిత్రక ఆధారాలంటూ వర్మ అసంబద్ధంగా మాట్లాడిన మాటల్ని ఆమె కొట్టి పారేశారు. సంబంధం లేని విషయాలతో పోలిక పెడుతూ ఏ మాత్రం సెన్స్ లేకుండా చెత్త పోస్ట్ చేశావంటూ తండ్రిపై రేవతి మండి పడ్డారు. నా కూతురిగా కంటే పవన్ కల్యాణ్ అభిమానిగానే ఎక్కువగా చెప్పుకునే రేవతి నా పోస్ట్ పట్ల ఇలా స్పందించిందంటూ వర్మ ఫేస్‌బుక్‌ ద్వారా వెల్లడించారు. దానికి తిరిగి సమాధానం కూడా చేశారు.


ఆదిమ కాలం నాటి స్థితిలోనే నీ అవగాహన శక్తి ఉందని నువ్వు చెప్పిన తీరును బట్టి అర్థం అవుతోందంటూ కూతుర్ని దెప్పిపొడిచారు. పవన్ కల్యాణ్‌లో దాగి ఉన్న తాత్వికతను అర్థం చేసుకునే విషయంలో నీ అవగాహన శక్తి ఏ మాత్రమో అర్థం అవుతోంది. నిజం ఏంటంటే నీకంటే పవన్ అంటే నాకే ఎక్కువ ఇష్టం. నా అంతగా పవర్ స్టార్‌ను నువ్వు ఇష్టపడటం లేదని బదులిచ్చారు.