ట్విటర్ నుంచి రామ్ గోపాల్ వర్మ ఔట్ !

ప్రముఖ ఫిలిం మేకర్ రామ్‌ గోపాల్ వర్మ ట్విటర్ నుంచి తప్పుకున్నారు. 2009లో సరిగ్గా ఇదే రోజున, అంటే మే 27న తన పేరిట ట్విటర్ ఖాతా ప్రారంభించిన వర్మ.. అదే ఖాతా ద్వారా అనేక మంది సినీ, రాజకీయ, వ్యాపార ప్రముఖులపై తనదైన సెటైర్లు వేశారు. అలా సెటైర్లు వేసినందుకుగాను పలు సందర్భాల్లో ఇబ్బందులు సైతం ఎదుర్కున్నారు. ఎవరి గురించైనా, ఎంతటివారి గురించైనా.. తనకి తోచించి తోచినట్టు చెప్పడానికి ఏ మాత్రం వెనుకాడని వర్మ.. ట్విటర్ ద్వారా అనేక సందర్భాల్లో అనేక సంచలన వ్యాఖ్యలు చేశారు.

అటివంటి వర్మ ఉన్నట్టుండి ఈ రోజు ట్విటర్ నుంచి నిష్క్రమిస్తున్నట్టు ప్రకటించారు. ఇకపై ఇన్‌స్టాగ్రామ్‌లో కొనసాగనున్నట్టు స్పష్టంచేశారు. ఫోటోలు, వీడియోల రూపంలో ఇన్‌స్టాగ్రామ్‌లో టచ్‌లో వుంటానని తెలిపారు వర్మ. తన ట్విటర్ ఖాతా ప్రారంభం, ముగింపుని ఆర్జీవీజూమ్ఇన్ జనన, మరణాలుగా అభివర్ణించిన వర్మ.. తన నిర్ణయానికిగల కారణాన్ని మాత్రం వెల్లడించలేదు.

తన నిర్ణయం ఏదైనా అది 'నా ఇష్టం' అని దాగుడుమూతలు లేకుండా ముక్కుసూటిగా మాట్లాడే వర్మ ట్విటర్ నుంచి ఎగ్జిట్ అయ్యే సందర్భంలోనూ తన ఫాలోవర్స్‌కి అటువంటి సందేశమే ఇచ్చారు. 'ఇన్నేళ్లపాటు తనని ఫాలో అయినందుకు నో థాంక్స్' అంటూ తనదైన స్టైల్లోనే తన ఫాలోవర్స్‌కి గుడ్ బై చెప్పారు వర్మ.