వర్మ ప్రశ్నకు ఆన్సర్ ఉందా?

వివాదాస్పద దర్శకుడు రామ్ గోపాల్ వర్మ మరోసారి సంచలన కామెంట్స్ చేశారు. కాంట్రవర్శీ ఎక్కడ ఉంటే అక్కడ వర్మ ప్రత్యక్షం అవుతారు. ఎలాంటి విషయాల్లో స్పందిస్తే అది వివాదం అవుతుందే వర్మకు తెలిసినంతగా ఇండస్ట్రీలో మరెవ్వరికీ తెలియదు. అందుకే వర్మ తన సినిమాలకు ఈ వివాదాలనే పెట్టుబడిగా ఉపయోగించుకుని ఫ్రీ పబ్లిసిటీ కొట్టేస్తాడు.

తాజాగా టాలీవుడ్‌ను గత కొన్ని రోజులుగా ఊపేస్తున్న చలపతిరావు రగడపై వర్మ తనదైన శైలిలో స్పందించి హాట్ టాపిక్‌గా మారారు. ఇటీవల చలపతిరావు ‘రారండోయ్ వేడుక చూద్దాం’మూవీ ప్రీ రిలీజ్ ఫంక్షన్‌లో అమ్మాయిలు మనశ్శాంతికి హానికరం అన్న ప్రశ్నకు ‘అమ్మాయిలు పక్కలోకి పనికొస్తారంటూ’ సంచలన కామెంట్స్ చేయడంతో ఆయనపై విమర్శలు వెల్లువెత్తాయి. తప్పైపోయింది మహా ప్రభో అని వేడుకున్నా ఆయనపై క్రిమినల్ కేసులు నమోదయ్యే వరకూ మహిళా సంఘాలు సోషల్ మీడియా శాంతించలేదు.

అయితే చలపతి రగడను ఇక్కడితో వదిలేస్తే మంచిది, చలపతిరావు తప్పైపోయిందని ఒప్పుకున్నారు. ఇప్పటికే ఆయన పరువు మొత్తం గంగలో కలిసిపోయింది, ఇక ఈ వివాదాన్ని ఎక్కువ చేయడం మంచిది కాదనే అభిప్రాయాన్ని చాలా మంది వ్యక్తం చేస్తూ వస్తున్నారు. తాజాగా రామ్ గోపాల్ వర్మ చలపతిరావుకు సపోర్ట్ చేస్తూ ఏ అండాలేదనే చలపతిరావును టార్గెట్ చేస్తున్నారు. మరి మిగతా వారి పరిస్థితి ఏంటని ప్రశ్నించారు.

చలపతిరావు రావుపై విమర్శలు చేసే వారు తన ప్రశ్నలకు సమాధానం చెప్పాలని.. ఓ సీనియర్ నటుడు.. ఎమ్మెల్యే ఆడవాళ్లను కించపరుస్తూ మాట్లాడినప్పుడు వీరంతా ఎక్కడ దాక్కున్నారని.. అలాగే ఓ సీనియర్ కమెడియన్ పలు ఆడియో వేడుకల్లో మహిళలపై అసభ్యకరమైన పదజాలాన్ని వాడలేదా అప్పుడేమయ్యారని ప్రశ్నించారు.

టీవీ కార్యక్రమాల్లో డబుల్ మీనింగ్ వస్తుంటే విని ఎంజాయ్ చేస్తున్పప్పుడు అవి అసభ్యకరమైన మాటలని అనిపించడం లేదా అంటూ సూటి ప్రశ్నలు వేశారు రామ్ గోపాల్ వర్మ. కాగా ఈ వివాదాల దర్శకుడు తన ట్విట్టర్ పిట్ట ఇక కూయదంటూ తాజాగా స్టేట్ మెంట్ ఇచ్చిన సంగతి తెలిసిందే.