Ram Pothieni: రామ్ Vs 1500 మంది ఫైటర్లు.. బోయపాటి యాక్షన్ వేరే లెవెల్!

మాస్ డైరెక్టర్ బోయపాటి శ్రీను (Boyapati Srinu) సినిమాల్లో యాక్షన్ సన్నివేశాలు ఒక రేంజ్‌లో ఉంటాయి. ఆయన ఎలివేట్ చేసేంతగా హీరోని మరో దర్శకుడు ఎలివేట్ చేయలేడు అంటే అతిశయోక్తి కాదు. బోయపాటి సినిమాల్లో హీరో ఏదైనా చేయగలిగేలా ఉంటాడు. ఎలాంటి హీరోనైనా తన పంథాలోకి తీసుకొచ్చి సరికొత్తగా ఆవిష్కరిస్తారు బోయపాటి. నందమూరి బాలకృష్ణ దగ్గర నుంచి బెల్లంకొండ సాయి శ్రీనివాస్ వరకు ప్రతి హీరోని కొత్తగా, ఊర మాస్ లుక్‌లో చూపించారయన. ఇప్పుడు ఉస్తాద్ రామ్ పోతినేని (Ram Pothineni) వంతు వచ్చింది.రామ్ పోతినేని హీరోగా బోయపాటి శ్రీను దర్శకత్వంలో ఒక సినిమా తెరకెక్కుతోన్న సంగతి తెలిసిందే. పవన్ కుమార్ సమర్పణలో శ్రీనివాసా సిల్వర్ స్క్రీన్ బ్యానర్‌పై శ్రీనివాస చిట్టూరి ఈ సినిమాను నిర్మిస్తున్నారు. ఈ సినిమాకు ఇంకా టైటిల్ ఖరారు చేయలేదు. #BoyapatiRAPO అనే వర్కింగ్ టైటిల్‌తో మూవీ రూపొందుతోంది. ఈ సినిమాను దసరా కానుకగా అక్టోబర్ 20న విడుదల చేయనున్నట్టు గత నెలలో నిర్మాత ప్రకటించారు. మాస్‌‌తో పాటు కుటుంబ ప్రేక్షకులను మెప్పించే సినిమాకి ఇది సరైన తేదీ అని.. దసరా సెలవులు సినిమాకి కలిసిరాబోతున్నాయని చిత్ర యూనిట్ వెల్లడించింది.

సినిమా విడులకు ఇంకా ఐదు నెలల సమయం ఉండటంతో ఎక్కడా రాజీ పడకుండా నిర్మిస్తున్నారు. ఇది పాన్ ఇండియా మూవీ కావడంతో దర్శకుడు బోయపాటి శ్రీను మరింత భారీగా ఈ సినిమాను తెరకెక్కిస్తున్నారట. దీనిలో భాగంగానే సినిమాలో ఒక భారీ ఫైట్ సీక్వెన్స్‌ను ప్లాన్ చేశారట బోయపాటి. ఈ యాక్షన్ సీక్వెన్స్ చిత్రీకరణ ప్రస్తుతం హైదరాబాద్‌లో జరుగుతోంది. బుధవారం మొదలైన ఈ యాక్షన్ సీక్వెన్స్ చిత్రీకరణ ఫైట్ మాస్టర్ స్టన్ శివ నేతృత్వంలో జరుగుతోంది. 1500 మంది ఫైటర్లతో కలిసి ఈ యాక్షన్ సన్నివేశాలను చిత్రీకరిస్తున్నారు. సినిమాకు ఈ సన్నివేశాలు ప్రత్యేక ఆకర్షణగా నిలుస్తాయని చిత్రవర్గాలు చెబుతున్నాయి.

ఈ మాస్ యాక్షన్ ఎంటర్‌టైనర్‌లో రామ్ సరసన కన్నడ బ్యూటీ శ్రీలీల నటిస్తున్నారు. ప్రముఖ నటీనటీలు ఈ సినిమాలో ముఖ్య పాత్రలు పోషిస్తున్నారని గతంలో చిత్ర నిర్మాణ సంస్థ ప్రకటించినా ఆ నటీనటులు ఎవరనేది ఇంకా స్పష్టత లేదు. ఎస్.ఎస్.తమన్ సంగీతం సమకూరుస్తోన్న ఈ సినిమాకు తమ్మిరాజు ఎడిటింగ్ బాధ్యతలు నిర్వర్తిస్తున్నారు. సంతోష్ డిటాకే సినిమాటోగ్రఫీ అందిస్తున్నారు.

ఇదిలా ఉంటే, 2017 నుంచి రామ్ ఏడాదికి ఒక సినిమా చొప్పున చేసుకుంటూ వస్తు్న్నారు. ఈ ఐదేళ్ల కాలంలో రామ్ నుంచి వచ్చిన బ్లాక్ బస్టర్ ‘ఇస్మార్ట్ శంకర్’ ఒక్కటే. కిందటేడాది లింగుస్వామి దర్శకత్వంలో వచ్చిన ‘ది వారియర్’ కూడా ప్రేక్షకులను ఆకట్టుకోలేకపోయింది. దీంతో ఈసారి ఎలాగైనా బోయపాటితో కలిసి బ్లాక్ బస్టర్ కొట్టాలని రామ్ చూస్తున్నారు. ఈ ప్రాజెక్ట్‌పై ఉన్న నమ్మకంతోనే పాన్ ఇండియా స్థాయిలో తెలుగు, తమిళం, కన్నడ, మలయాళం, హిందీ భాషల్లో విడుదల చేస్తున్నారు.