స్టన్నింగ్‌: మ్యాగజైన్ కవర్‌పేజ్ పై ర‌మ్య‌కృష్ణ‌

దక్షిణాదిన అత్యధిక పారితోషకం పొందుతున్న లేడీ కేరెక్టర్ ఆర్టిస్ట్ రమ్య. హీరోయిన్ గా లీడింగ్ లో ఉన్న రోజుల్లోనే ‘నరసింహా’వంటి సినిమాలో హీరోకు ధీటైన పాత్రతో పాటు.. ఎన్నో లేడీ ఓరియెంటెడ్ సినిమాల్లో నటించిన రమ్య ఇప్పటికీ అదే ప్రభతో వెలుగుతున్నారు. ‘బాహుబలి’ తర్వాత రమ్య ప్రస్థానం మరింత ప్రభను సంతరించుకుంది.


కేవలం నటన విషయంలోనే కాదు.. గ్లామర్ విషయంలో కూడా రమ్య‌కృష్ణ‌ వన్నె తగ్గలేదు. 46 యేళ్ల వయసు అంటే నమ్మడం కష్టమే... తాజాగా జేఎఫ్‌డబ్ల్యూ మ్యాగజైన్ ముఖచిత్రంపై రమ్య ఇచ్చిన పోజును చూశాకా! తల్లి పాత్రలు చేస్తున్నా, నయా హీరోయిన్లకు పోటీ ఇచ్చేంత గ్లామరస్‌గా కనిపిస్తోంది రమ్య. ఇటీవలే నాగార్జున సరసన ఒక హీరోయిన్‌గా నటించి.. ఆ సినిమాలోని అరడజను మంది అమ్మాయిలకు పోటీని ఇచ్చిన రమ్య.. సీనియర్ హీరోల సరసన చక్కగా అమరేలా ఉంది ఈ లుక్‌లో.

చిరంజీవి, బాలయ్య, వెంకటేష్ వంటి హీరోల సరసన ఒకప్పుడు యంగ్ హీరోయిన్ గా కనిపించిన రమ్య, ఇప్పుడు ఆ హీరోల సరసన మరోసారి నటించడానికి తగ్గట్టుగానే కనిపిస్తోంది. మరి టాప్‌హీరోలు మళ్లీ రమ్యతో జతకడితే.. ఆ కాంబో ప్రత్యేక ఆకర్షణే అవుతుంది.