ఆంజనేయుడిగా రానా!

తన సినిమాలు, పాత్రల ఎంపిక విషయంలో రానా దగ్గుబాటి మొదటి నుంచి ప్రత్యేకతను చాటుతున్నాడు. ‘బాహుబలి’ సినిమా తరువాత ఆయన పాత్రలను ఎంపిక చేసుకునే తీరు మరింత భిన్నంగా ఉంది. ‘బాహుబలి’ పూర్తయిన వెంటనే ‘ఘాజీ’ వంటి దేశభక్తి, యుద్ధ నేపథ్యం ఉన్న సినిమాలో నటించాడు. తాజాగా పొలిటికల్ డ్రామా ‘నేనే రాజు నేనే మంత్రి’ సినిమాలో జోగేంద్ర పాత్రలో నటించిన విమర్శల మెప్పు పొందాడు. ఇప్పుడు గుణశేఖర్ దర్శకత్వం వహించనున్న ‘భక్తప్రహ్లాద’ చిత్రంలో హిరణ్యకశిపుడు పాత్రలో రానా కనిపించబోతున్నాడని అంటున్నారు. అయితే భవిష్యత్తులో ఆయన మరిన్ని పౌరాణిక పాత్రల్లో కనిపించే అవకాశాలున్నాయని టాక్. ఈ క్రమంలో రానాను ఆంజనేయుడి పాత్ర కోసం ఎంపిక చేసుకున్నారని తెలుస్తోంది.

మంచు ఫ్యామిలీ కొంత కాలంగా ‘రావణ’ అనే ఇతిహాస చిత్రాన్ని తెరకెక్కించడానికి కసరత్తులు చేస్తోంది. మోహన్ బాబు ఈ ప్రాజెక్ట్‌పై ఆసక్తిగా ఉన్నారు. ఆయనే స్వయంగా రావణ పాత్రను పోషించబోతున్నారట. ఇంటర్నేషనల్ టెక్నీషియన్స్ ఈ సినిమా కోసం పని చేయబోతున్నారని అంటున్నారు. ప్రస్తుతం ఈ సినిమా స్క్రిప్ట్ వర్క్ జరుగుతోంది. అయితే ఈ సినిమాలో ఆంజనేయుడి పాత్ర కోసం రానా వద్ద ప్రస్తావించగా ఆయన కూడా నటించడానికి సముఖుత వ్యక్తం చేసినట్లు తెలుస్తోంది. అన్నీ కుదిరితే ఈ సినిమాను దర్శకేంద్రుడు రాఘవేంద్రరావు డైరెక్ట్ చేసే అవకాశాలు ఉన్నాయి.