రానా ప్రీ-వెడ్డింగ్: గవ్వల ఆభరణాలతో ముస్తాబైన మిహీకా.. ఎంతైనా మమ్మీ డిజైనర్ కదా!!

టాలీవుడ్ హీరో రానా దగ్గుబాటి మరో రెండు రోజుల్లో తన బ్యాచ్‌లర్ లైఫ్‌కు బైబై చెప్పబోతున్నారు. ప్రేయసి మిహీకా బజాజ్‌ను ఆయన పెళ్లాడబోతున్నారు. ఇప్పటికీ ఇరువురి ఇళ్లలో ప్రీ-వెడ్డింగ్ సందడి మొదలైపోయింది. జూబ్లీహిల్స్‌లోని మిహీకా బజాజ్ ఇంట్లో బుధవారం నిర్వహించిన పసుపు దంచే కార్యక్రమంతో పెళ్లి వేడుకలు మొదలయ్యాయి. ఈ పసుపు వేడుకలో కాబోయే పెళ్లికూతురు మిహీకా పసుపు, బంగారు వర్ణం లెహెంగాలో మెరిసిపోయారు. అలాగే, ఆమె ధరించిన గవ్వల ఆభరణాలు ప్రత్యేక ఆకర్షణగా నిలిచాయి.

Also Read: రానా - మిహీకా వివాహం: అతిథులందరికీ కరోనా పరీక్షలు.. వారికి ఆహ్వానం లేదు

సముద్రంలో దొరికే చిన్న చిన్న గవ్వలతో చేసిన ఆభరణాలను మిహీకా ధరించారు. పాపిట బొట్టు, చెవి జుంకీలు, చేతి కడియాలను ఈ గవ్వలతో తయారు చేశారు. వాటిని అందంగా మిహీకాకు అలంకరించారు. ఈ ఆభరణాలు కాస్త కొత్తగా ఉన్నా.. చాలా అందంగా, ప్రత్యేకంగా ఉన్నాయి. ఎంతైనా బజాజ్ ఫ్యామిలీ డిజైనర్ల ఫ్యామిలీ కదా.. ఆ మాత్రం ప్రత్యేకత ఉండాలి. మిహీకా తల్లి బంటీ బజాజ్ ప్రముఖ జువెలరీ డిజైనర్. అందుకే, తన కుమార్తెకు ఈ గవ్వల ఆభరణాలను ప్రత్యేకంగా డిజైన్ చేసినట్టున్నారు.
ఇక రానా విషయానికి వస్తే.. ఆయన తెలుపు రంగు షర్ట్, ధోతిలో చాలా సింపుల్‌గా ఉన్నారు. గతంలో రోకా ఫంక్షన్‌లో కనిపించిన లుక్‌లోనే రానా కనిపించారు. పసుపు దంచే వేడుకలో మిహీకాతో తీసుకున్న ఫొటోను రానా ఇన్‌స్టాగ్రామ్ ద్వారా అభిమానులతో పంచుకున్నారు. ఈ ఫొటోలో కాబోయే దంపతులు మెరిసిపోతున్నారు. చిరునవ్వులు చిందిస్తున్నారు. ఇదిలా ఉంటే, గురువారం సాయంత్రం మిహీకా ఇంట మెహందీ వేడుక జరగనుంది. ఈ మెహందీ ఫంక్షన్ కోసం లేత గులాబీ వర్ణం లెహెంగాలో మిహీకా ముస్తాబవుతున్నారు. కాగా, రానా-మిహీకా వివాహం ఈనెల 8న అంటే శనివారం రామానాయుడు స్టూడియోస్‌లో చాలా తక్కువ మంది కుటుంబ సభ్యుల సమక్షంలో జరగనుంది.