చదువుకునే రోజుల్లోనే డ్రగ్స్ అలవాటుందన్న హీరో

ఓవైపు టాలీవుడ్‌ని కుదిపేస్తోన్న డ్రగ్స్ రాకెట్ కేసులో సిట్ అధికారుల నుంచి నోటీసులు అందుకున్న సంగతిని బయటికి వెల్లడించడానికే సెలబ్రిటీలు వెనుకడుగేస్తోంటే, మరోవైపు బాలీవుడ్ హీరో రణ్‌బీర్ కపూర్ మాత్రం తనంతట తానే తనకి డ్రగ్స్ అలవాటు వుండేది అని అంగీకరించాడు. స్కూల్ డేస్‌లోనే డ్రగ్స్ అలవాటు వుండేది. కానీ సినిమాల్లోకి వచ్చే ముందు ఆ అలవాటు నుంచి బయటపడ్డాను అని అన్నాడు రణ్‌బీర్ కపూర్.

ఆ తర్వాత 2011లో రాక్‌స్టార్ సినిమా షూటింగ్ సమయంలోనూ ఓ సన్నివేశంలో సహజంగా నటించడం కోసం డ్రగ్స్ తీసుకున్నట్టు తెలిపాడు రణ్‌బీర్ కపూర్. ప్రస్తుతం రణ్‌బీర్ కపూర్ చేస్తున్న సినిమా కూడా ఓ విధంగా డ్రగ్స్‌తో ముడిపడి వున్నదే. ఎందుకంటే ఇప్పుడాయన చేస్తున్న సినిమా సంజయ్ దత్ రియల్ స్టోరీ ఆధారంగా తెరకెక్కుతోంది.

రియల్ లైఫ్‌లో సంజయ్ దత్ కూడా డ్రగ్స్‌కి బానిసైన సినీ నటుడే. డ్రగ్స్ కేసులో ఎన్నోసార్లు విచారణ ఎదుర్కున్నాడు సంజయ్ దత్. ఈ సినిమాలో డ్రగ్స్ వినియోగం ప్రస్తావన వుందని చెప్పిన సందర్భంలోనే రణ్‌బీర్ కపూర్ తనకి కూడా ఒకప్పుడు డ్రగ్స్ అలవాటు వుండేది అని వెల్లడించాడు.