ఆసక్తి రేపుతున్న 'జగ్గా జాసూస్' ట్రైలర్

రణ్‌బీర్ కపూర్, కత్రినా కైఫ్ జంటగా నటించిన లేటెస్ట్ మూవీ జగ్గా జాసూస్ ట్రైలర్ ఎట్టకేలకి ఆడియెన్స్ ముందుకొచ్చింది. దాదాపు మూడు నిమిషాల నిడివి కలిగిన ఈ ట్రైలర్ ద్వారా సినిమా ఓవర్ వ్యూ చూపించేందుకు ట్రై చేశాడు డైరెక్టర్ అనురాగ్ బసు. ఈ సినిమాలో అదృశ్యమైన తన తండ్రిని అన్వేషించుకుంటూ వెళ్లే జగ్గా అనే ఓ టీనేజ్ యువకుడి పాత్రలో రణ్‌బీర్ కపూర్ కనిపించనుండగా.. అతడి జర్నీలో పార్ట్‌నర్ పాత్ర పోషించిన శృతిగా కత్రినా కైఫ్ నటించింది. జగ్గాకి మాటలు సరిగ్గా రాకపోవడం, నత్తిగా మాట్లాడటం ఈ సినిమాలో రణ్‌బీర్ పాత్రకి వున్న ప్రత్యేకత. ఎవరికి ఏం అర్థమయ్యేలా చెప్పాలన్నా అతడికి వున్న ఏకైక ప్రత్యామ్నాయం పాటల రూపంలో చెప్పడమే.

దాదాపు మూడేళ్ల క్రితం ప్రారంభమైన ఈ మ్యూజికల్ అడ్వెంచర్ సినిమాలో షారుఖ్ ఖాన్ అతిథి పాత్ర పోషించాడనే టాక్ వినబడుతోంది. 'జగ్గా జాసూస్' సెట్స్‌లో షారుఖ్ ప్రత్యక్షమైనప్పటి ఫోటో ఒకటి గతంలో ఇంటర్నెట్‌లో వైరల్ అవడమే అందుకు కారణం. మరో సీనియర్ హీరో గోవిందా కూడా ఈ సినిమాలో ఓ కీలక పాత్ర పోషించాడు. గోవిందా నటించిన సన్నివేశాల చిత్రీకరణ 2015లో పూర్తయినట్టు సమాచారం. జులై 14న ఆడియెన్స్ ముందుకు రానున్న ఈ సినిమా గురించి బాలీవుడ్ ఆడియెన్స్ భారీ ఆశలే పెట్టుకున్నారు.