‘రాజా ది గ్రేట్’లో రాశీ ఖన్నా ఐటమ్ సాంగ్

రాశీ ఖన్నా ఇప్పటి వరకు చాలానే సినిమాలే చేసినా అనుకున్నంత క్రేజ్ మాత్రం రాలేదనే చెప్పాలి. కానీ ఇప్పుడు ‘జై లవ కుశ’ లాంటి భారీ చిత్రంలో నటించడంతో రాశీ పేరు మారుమోగుతోంది. ప్రస్తుతం రాశీ చేతిలో సినిమాలు బాగానే ఉన్నాయి. ఓవైపు ‘జై లవ కుశ’లో ఎన్టీఆర్ సరన నటిస్తూనే మరోవైపు రవితేజతో ‘టచ్ చేసి చూడు’, మెగా హీరో వరుణ్ తేజ్‌తో ఒక సినిమా చేస్తోంది. అలాగే తమిళం, మలయాళంలో ఒక్కో సినిమాతో బిజీగా ఉంది. ఇప్పుడు తాజాగా మరో అవకాశం కొట్టేసింది.

మాస్ మహారాజ హీరోగా అనిల్ రావిపూడి దర్శకత్వంలో వెరైటీ కాన్సెప్ట్‌తో తెరకెక్కుతున్న ‘రాజా ది గ్రేట్’ సినిమాలో రాశీ ఖన్నా స్పెషల్ సాంగ్ చేస్తోంది. ఈ విషయాన్ని రాశీ స్వయంగా వెల్లడించింది. ఈ మేరకు గురువారం ఫేస్‌బుల్‌లో ఓ పోస్టు పెట్టింది. ‘నా లవ్‌లీ డైరెక్టర్ అనిల్ రావిపూడి కోసం రవితేజ, మెహ్రీన్ పిర్జాడా జంటగా నటిస్తున్న ‘రాజా ది గ్రేట్’లో ఓ పాటలో స్పెషల్ అప్పీరియన్స్ ఇస్తున్నా’ అని రాశీ పోస్టు చేసింది.

అయితే ఆ పాట ఐటమ్ సాంగ్ అని టాక్. రాశీ ఐటమ్ సాంగ్ సినిమాకు ప్లస్ అవుతుందని ఇండస్ట్రీ వర్గాల సమాచారం. రాశీ ఖన్నా కెరీర్లో చెప్పుకోదగిన మంచి సినిమాల్లో అనిల్ రావిపూడి దర్శకత్వం వహించిన ‘సుప్రీమ్’ ఒకటి. కాబట్టి అనిల్ రావిపూడితో ఉన్న స్నేహం కారణంగానే రాశీ ఖన్నా ఐటమ్ సాంగ్‌కి ఒప్పుకున్నట్లు సమాచారం. కాగా, ‘రాజా ది గ్రేట్’లో రవితేజ అంధుడిగా కనిపించనున్నాడు. రవితేజ తల్లిగా ప్రముఖ నటి రాధిక నటిస్తున్నారు. దిల్ రాజు నిర్మిస్తున్న ఈ సినిమాను అక్టోబర్‌లో విడుదల చేయడానికి సన్నహాలు చేస్తున్నారు.