ఆ మాస్ హీరో కోసం శ్రీను వైట్ల ప్రయత్నాలు?

దర్శకుడు శ్రీను వైట్లకు ఈ మధ్య ఏదీ కలిసి రావడం లేదు. ఆయన తీసిన సినిమాలన్నీ బాక్సాఫీసు వద్ద బోల్తా కొడుతున్నాయి. మూస ధోరణిలో సాగే కథలే దానికి పెద్ద కారణం అని చెప్పొచ్చు. ఆయన నమ్మిన ఫార్ములా నుంచి బయటకు వచ్చి సినిమాలు చేస్తే తప్ప సక్సెస్ అందుకునేలా కనిపించడంలేదు. ప్రస్తుతం శ్రీను వైట్లతో సినిమా అంటే హీరోలు కూడా వెనుకడుగు వేస్తున్నారు. దీంతో ఈ దర్శకుడు మరోసారి తనకు కలిసొచ్చిన హీరో వద్దకు చేరాడు. అతను మరెవరో కాదు మాస్ మహారాజ రవితేజ.

రవితేజ-శ్రీను వైట్ల గతంలో రెండు హిట్ సినిమాలు చేశారు. ఆ చిత్రాలు అటు రవితేజకు, ఇటు శ్రీను వైట్ల కెరీర్‌కు బాగా కలిసొచ్చాయి. శ్రీనువైట్ల దర్శకుడిగా మొదటి సినిమా చేసింది కూడా రవితేజతోనే.. అదే ‘నీకోసం’. ఇప్పుడు మరోసారి రవితేజతో కలిసి సినిమా చేయడానికి ప్లాన్ చేస్తున్నాడు వైట్ల. ‘మిస్టర్’ సినిమా బెడిసికొట్టడంతో ఆ చిత్ర నిర్మాతతో తక్కువ రెమ్యూనరేషన్‌కే మరో సినిమా చేస్తానని శ్రీను వైట్ల మాటిచ్చాడట. ఇప్పుడు ఆ సినిమా కోసం రవితేజను ఒప్పించే ప్రయత్నాల్లో ఉన్నాడు. మరి రవితేజ, శ్రీను వైట్లతో సినిమా అంటే అంగీకరిస్తాడో.. లేదో.. చూడాలి!