తమ్ముడిని అలా చూడలేను : రవితేజ

సినీనటుడు రవితేజ సోదరుడు భరత్ అంత్యక్రియలు జూబ్లీహిల్స్‌లోని మహాప్రస్థానంలో పూర్తయ్యాయి. నిన్న రాత్రి శంషాబాద్‌కి సమీపంలోని కొత్వాల్‌గూడ వద్ద ఔటర్ రింగ్ రోడ్డుపై ఆగి వున్న లారీని కారుతో అతివేగంగా ఢీకొట్టిన ఘటనలో భరత్ దుర్మరణంపాలైన సంగతి తెలిసిందే. ఉస్మానియా ఆస్పత్రిలో పోస్ట్‌మార్టం పూర్తయిన తర్వాత భరత్ భౌతికకాయాన్ని నేరుగా జూబ్లీహిల్స్‌లోని మహాప్రస్థానంకే తరలించారు.

రోడ్డు ప్రమాదం కారణంగా భరత్ ముఖం పూర్తిగా చిద్రమైపోవడంతో భరత్‌ని విగతజీవిగా ఈ పరిస్థితుల్లో చూడలేమని ఆవేదన వ్యక్తంచేస్తూ రవితేజ, అతడి తల్లి రాజ్యలక్ష్మి ఇద్దరూ భరత్ అంత్యక్రియలకి హాజరుకాకపోవడం అక్కడున్న వారిని కలచివేసింది. దీంతో రవితేజకు మరో సోదరుడైన రఘు మాత్రమే భరత్ అంతిమ సంస్కారాలని దగ్గరుండి పూర్తి చేశారు.

రవితేజ కుటుంబంతో అత్యంత సాన్నిహిత్యం కలిగిన ఉత్తేజ్ వంటి కొంతమంది సినీప్రముఖులు ఈ కష్టకాలంలో అతడికి అండగా నిలిచారు. రవితేజ స్నేహితులే భరత్ మృతదేహాన్ని ఔటర్ రింగ్ రోడ్డు నుంచి ఉస్మానియా ఆస్పత్రికి తరలించడం మొదలుకుని ఉస్మానియా ఆస్పత్రి నుంచి మహాప్రస్థానం చేర్చడం వరకు దగ్గరుండి చూసుకున్నారు. భరత్ అంత్యక్రియల్లో పలువురు సినీప్రముఖులు పాల్గొన్నారు.