నా కూతురు పెళ్లికి మీరు రావొద్దు! ఆ కారణంతో సీఎంకి కాల్ చేసి చెప్పిన సూపర్ స్టార్ కృష్ణ

సూపర్ స్టార్ కృష్ణ (Super Star Krishna) సాహసోపేత నిర్ణయాలకి పెట్టింది పేరు. సినిమాల పరంగానే కాదు.. సినిమాయేతర అంశాల్లోనూ కృష్ణ ధైర్యంగా నిర్ణయాలు తీసుకునే వారని అతనితో కలిసి ఒకప్పుడు నటించిన ఆర్టిస్ట్‌లు గుర్తు చేసుకుంటున్నారు. ఎంతలా అంటే? తన కూతురు వివాహానికి వచ్చేందుకు సిద్ధమైన ఓ రాష్ట్ర ముఖ్యమంత్రికి ఫోన్ చేసి ‘మీరు పెళ్లికి రావొద్దు’ అని చెప్పేశారట. ఆ సీఎం ఎవరో కాదు జయలలిత (Jayalalithaa). ఇగోకి అప్పట్లో కేరాఫ్ అడ్రస్‌గా ఉన్న జయలలిత.. కృష్ణ చెప్పిన కారణం విని కోప్పడలేదట.. సరదాగా నవ్వినట్లు ఓ ఇంటర్వ్యూలో కృష్ణ స్వయంగా చెప్పారు. మంగళవారం తుది శ్వాస విడిచిన కృష్ణకి బుధవారం మధ్యాహ్నం అంత్యక్రియలు (Actor Krishna Funeral) జరిగిన విషయం తెలిసిందే.

ఇంతకీ అసలు విషయం ఏంటంటే? గల్లా జయదేవ్‌తో కృష్ణ తన పెద్ద కుమార్తె పద్మావతి వివాహం నిర్ణయించారు. చెన్నైలో ఆడంబరంగా చేసిన ఆ పెళ్లికి ఏపీలోని రాజకీయ ప్రముఖులతో పాటు అప్పటి తమిళనాడు సీఎం జయలలితని కూడా కృష్ణ ఆహ్వానించారు. అప్పటికే కృష్ణతో గూఢాచారి 116, నిలుపు దోపిడి తదితర సినిమాల్లో ఆమె నటించారు. ఆ సాన్నిహిత్యంతో తప్పకుండా పెళ్లికి వస్తానని హామీ ఇచ్చారు.

కానీ.. వివాహానికి సరిగ్గా మూడు రోజులు ముందు కృష్ణ ఇంటికి వచ్చిన జయలలిత సెక్యూరిటీ ఆఫీసర్.. ఓ రిక్వెస్ట్ చేశారు. పెళ్లికి సీఎం వస్తున్నారని అయితే సెక్యూరిటీ రీజన్స్ కారణంగా జయలలిత, ఆమెతో పాటు వచ్చే వారి కోసం కళ్యాణ మండపంలో తొలి మూడు వరుసల సీట్లని కేటాయించాలని కోరారు. కానీ కృష్ణ అందుకు ఒప్పుకోలేదు. దానికి కారణం ఏంటంటే? అప్పటికే ఉమ్మడి ఆంధ్రప్రదేశ్‌లో చాలా మంది రాజకీయ, సినీ ప్రముఖులని అతను ఆహ్వానించారు. వారిని పక్కన పెట్టి తొలి మూడు వరుసలు జయలలిత కోసం కేటాయించడం భావ్యం కాదని కృష్ణ భావించారు. అదే విషయాన్ని జయలలితకి ఫోన్ చేసి చెప్పి.. ‘‘మీరు వివాహానికి రావొద్దు.. దంపతులకి మీ ఆశీర్వాదం ఉంటే చాలు’’ అని చెప్పారట. దాంతో జయలలిత నవ్వేసి.. పెళ్లి రోజున నూతన దంపతుల్ని ఆశీర్వదిస్తూ ఓ బొకెని పంపారట.

Read Latest Telugu Movies , Telugu News , Super Star Krishna Updates

Read More: దు:ఖంలోనూ ప్రేమ కురిపించిన సూపర్ స్టార్
Read Also: కృష్ణ పాడె మోసిన మురళీ మోహన్.. ఇద్దరి మధ్య స్నేహం అలాంటిదిRead More:కృష్ణని కడసారి చూసేందుకు వచ్చిన జూనియర్ కృష్ణ